AZƏRBAYCAN MİLLİSİ LİXTENŞTEYNLƏ GÖRÜŞƏ QƏLƏBƏ ƏZMİ İLƏ ÇIXACAQDIR
AZƏRTAC xəbər verir ki, bunu Azərbaycan yığma futbol komandasının baş məşqçisi Berti Foqts sentyabrın 9-da AFFA-nın inzibati binasında keçirdiyi mətbuat konfransında bəyan etmişdir.
Azərbaycan yığmasının sentyabrın 6-da Uelslə keçirdiyi görüşü şərh edən B.Foqts komandamızın yaxşı təsir bağışladığını, futbolçuların oyunundan razı qaldığını bildirmişdir. Baş məşqçi daha sonra millimizi qarşıda Lixtenşteynlə çətin oyun gözlədiyini, bunun həm futbolçularımız, həm də ölkəmiz üçün mühüm əhəmiyyət kəsb etdiyini vurğulamışdır. Rəqib komandanın Almaniya ilə görüşünü təhlil etdiyini deyən B.Foqts Azərbaycan yığmasının bu görüşə tam hazır olduğunu, sabahkı oyuna böyük ruh yüksəkliyi və qələbə əzmi ilə çıxacağını söyləmişdir.
Baş məşqçi əminliklə bildirmişdir ki, Azərbaycanın futbol həvəskarları 3-4 ildən sonra tamam başqa komanda görəcək, oyunçularımız hətta Avropanın tanınmış klublarına dəvət alacaqlar.
Tədbirin sonunda jurnalistləri maraqlandıran suallar cavablandırılmışdır.
Bölmənin digər xəbərləri
