AZƏRBAYCAN MÜTƏXƏSSİSİNƏ DÜNYA TURİZM TƏŞKİLATININ DİPLOMU TƏQDİM OLUNMUŞDUR
Dünya Turizm Təşkilatı (DTT) Milanda “Turizm siyasəti və strategiyası” mövzusunda ixtisasartırma kursları keçirmişdir. Tədbirdə ilk dəfə olaraq Azərbaycan nümayəndəsi də iştirak etmişdir. Gənclər, İdman və Turizm Nazirliyinin baş turizm idarəsindən AZƏRTAC-ın müxbirinə bildirmişlər ki, Avropa, Afrika və Asiyanın 14 ölkəsindən turizmlə bağlı dövlət strukturlarında işləyən mütəxəssislərin iştriak etdiyi kurslarda Azərbaycanı baş turizm idarəsinin informasiya və təbliğat şöbəsinin təlimatçısı Səbinə Kərimova təmsil etmişdir. Kurslarda Luici Bokkoni Universitet müəllimlərinin, DTT ekspertlərinin dünya turizm biznesinin aktual istiqamətləri mövzusunda mühazirələri dinlənilmiş, Genuyada keçirilən praktik məşğələlərdə isə İtaliyada sahilyanı turizmin təşkili barədə məlumat verilmişdir. Məşğələlərin sonunda iştriakçıların hamısına Dünya Turizm Təşkilatının diplomları təqdim olunmuşdur.
