Azərbaycan Premyer Liqası: “Neftçi” və “Qarabağ” komandalarının start heyətləri açıqlanıb
Bakı, 7 fevral, AZƏRTAC
Fevralın 7-də saat 19:00-da Azərbaycan Premyer Liqasının XV turu çərçivəsində “Bakcell Arena”da üz-üzə gələcək “Neftçi” və “Qarabağ” komandalarının start heyətləri açıqlanıb.
AZƏRTAC xəbər verir ki, “Neftçi”nin start heyətində İvan Brkiç, Emin Mahmudov, Xəyal Nəcəfov, Azər Salahlı, Eddi İsrafilov, Voyislav Stankoviç, Yusuf Laval, Huqo Basto, Tiaqo Bezerra, Gilyerme Pato və Mert Çelik yer alıblar.
“Qarabağ” baş məşqçisi Qurban Qurbanov ilk “11-lik”də Luka Quqeşaşvili, Rahil Məmmədov, İsmayıl İbrahimli, Filip Ozobiç, Ramil Şeydayev, Riçard Almeyda, Abdullah Zubir, Kevin Medina, Marko Veşoviç, Kadi Borqes və Toral Bayramova yer verib.
Xatırladaq ki, turun açılış matçında “Keşlə” klubu öz meydanında “Zirə” komandasına minimal hesabla məğlub edib - 1:0.
“Qarabağ” klubu 33 xalla turnir cədvəlinə başçılıq edir. “Neftçi”nin isə aktivində 22 xal var və “flaqman” 3-cü sırada yer alıb.
Ağdam klubunda zədəlilər Xayme Romero və Şahruddin Məhəmmədəliyevlə yanaşı, cəzalı olan Patrik Andrade də vacib oyunu buraxacaq. Paytaxt təmsilçisində isə yeganə itki qapıçı Aqil Məmmədovdur.
Bu, komandaların Premyer Liqadakı 86-cı dueli olacaq. İndiyədək baş tutmuş 85 qarşılaşmada “köhlən atlar” rəqibini 32 dəfə məğlub edib. 23 oyun “ağ-qaralar”ın xeyrinə başa çatıbsa, 30 oyun heç-heçə ilə yekunlaşıb. “Qarabağ”ın vurduğu 98 qola “Neftçi” 77 topla cavab verib. Son 6 matçda bərabərlik qeydə alınmayıb. Qurban Qurbanovun baş məşqçi olduğu kollektiv son iki oyunda rəqibinə qalib gəlib.
Turun digər iki qarşılaşması - “Sabah” - “Qəbələ” və “Səbail” - “Sumqayıt” fevralın 8-də baş tutacaq.
Bölmənin digər xəbərləri
