Azərbaycan Premyer Liqasının XVI turunun oyun cədvəli müəyyənləşib
Bakı, 14 fevral, AZƏRTAC
Futbol üzrə Azərbaycan Premyer Liqasının XVI turunun oyun cədvəli məlum olub.
AZƏRTAC Peşəkar Futbol Liqasının (PFL) saytına istinadla xəbər verir ki, XVI turun oyunları iki günü əhatə edəcək. Turun “Qarabağ” - “Sumqayıt” görüşü mayın 12-nə təxirə salınıb.
Tura fevralın 19-da saat 15:00-da Qəbələ şəhər stadionunda “Qəbələ” klubu ilə autsayder “Səbail” komandası arasında matçla start veriləcək. Həmin gün keçiriləcək “Neftçi” - “Keşlə” oyunu isə saat 17:15-də başlayacaq. Qarşılaşma “Bakcell Arena”da təşkil olunacaq.
İkinci oyun günündə - fevralın 20-də “Zirə” klubu “Sabah” komandasını qəbul edəcək. Qarşılaşma Zirə Olimpiya İdman Kompleksinin stadionunda baş tutacaq.
Qeyd edək ki, turun bütün görüşləri “CBC Sport” kanalı ilə canlı yayımlanacaq.
On beş turdan sonra turnir cədvəlinə 36 xalla “Qarabağ” klubu başçılıq edir. “Qəbələ” klubu 26 xalla ikinci, “Zirə” 25 xalla üçüncü yerdə qərarlaşıblar. Digər pillələrdə müvafiq olaraq, “Neftçi” (22 xal), “Sabah” (20), “Keşlə” (14), “Sumqayıt” (13) və “Səbail” (11) yer alıblar.
Bölmənin digər xəbərləri
