AZƏRBAYCAN PREZİDENTİ HEYDƏR ƏLİYEV “İPƏK YOLU” KOMMUNİKASİYA SİSTEMİNİN RƏHBƏRİNİ QƏBUL ETMİŞDİR
Azərbaycan Prezidenti Heydər Əliyev martın 18-də Prezident sarayında “İpək yolu” kommunikasiya sisteminin rəhbəri, məşhur alim və ictimai xadim, Rusiya Elmlər Akademiyasının akademiki Roald Saqdeyevi qəbul etmişdir.
Roald Saqdeyev səmimi qəbula görə Azərbaycan Prezidentinə təşəkkürünü bildirərək, dedi ki, faciəli 11 sentyabr hadisələri dünyada siyasi proseslərin gedişinə, amerikalıların mentalitetinə köklü təsir göstərmişdir. Bu hadisələr anlatdi ki, iqtisadiyyatda, texnikada nə qədər irəli getsək də, fərqi yoxdur, biz də dünyanın bir hissəsiyik və təcrid olunmuş halda yaşaya bilmərik. Qonaq beynəlxalq terrorizmə qarşı birgə mübarizə aparılmasının vacibliyini vurğuladı və 11 Sentyabr hadisələrinə dünya ölkələri rəhbərləri arasında birincilər sırasında münasibətini bildirən Azərbaycan Prezidenti Heydər Əliyevin mövqeyini yüksək qiymətləndirdi.
Prezident Heydər Əliyev bildirdi ki, Azərbaycan rəhbərliyinin bu mövqeyi onunla bağlıdır ki, terrorizmin, xüsusən də qlobal miqyas almış terrorizmin nə qədər təhlükəli olduğunu ölkəmizdə aydın başa düşürlər. Dünyanin ayılması və terrorizmin nə demək olduğunu başa düşməsi üçün gec-tez nə isə baş verməli idi.
Roald Saqdeyev səfərinin məqsədi barədə məlumat verərək dedi ki, vahid telekommunikasiya sisteminin yaradılması, bir növ, islam dünyası ölkələrinə informasiya təbliğatı aparılmasına yardımdır. Bu, 11 sentyabr hadisələrindən sonra və Əfqanıstanda hərbi əməliyyatların aparıldığı dövrdə xüsusilə aktual olmuşdur. Qonaq xatırlatdı ki, Azərbaycan Milli Elmlər Akademiyasının prezidenti, akademik Mahmud Kərimovun başçılıq etdiyi nümayəndə heyətinin ABŞ-a səfəri zamanı rəsmi şəxslərlə bir sıra görüşlər, o cümlədən Prezident Buşun elm üzrə müşaviri ilə görüş keçirilmiş, bu barədə fikir mübadiləsi aparılmışdır.
Roald Saqdeyev Amerikanın təhsil sahəsində beynəlxalq əməkdaşlıq təşkilatı ilə birlikdə idarəetmə, iqtisadiyyat, informatika ixtisasları üzrə birgə Amerika-Azərbaycan aspiranturası yaradılması təklifini də irəli sürür. Bu təklif aspirantın təhsilin yarısını ABŞ-da, yarısını isə Azərbaycanda almasını, sonda isə ona hər iki tərəfin diplomunun verilməsini nəzərdə tutur.
Azərbaycan Prezidenti ölkəmizin təhsil sistemində bu məsələnin həllini gözləyən bəzi məqamlarına toxunaraq, Milli Elmlər Akademiyasının rəhbərliyinə aspirantura məsələsini beynəlxalq standartlar baxımından həll etməyi tapşırdı.
Qəbulda Milli Elmlər Akademiyasının prezidenti Mahmud Kərimov, Prezidentin Katibliyinin rəisi Dilarə Seyidzadə, Prezidentin İcra Aparatının humanitar siyasət şöbəsinin müdiri Fatma Abdullazadə, MEA-nın vitse-prezidenti Arif Mehdiyev iştirak edirdilər.
Foto Oqtay Aydınoğlunundur
Bölmənin digər xəbərləri
