AZƏRBAYCAN PREZİDENTİ HEYDƏR ƏLİYEV RUSİYANIN XARİCİ İŞLƏR NAZİRİ İQOR İVANOVU QƏBUL ETMİŞDİR
Yanvarın 26-da Azərbaycan Prezidenti Heydər Əliyev Kremldə onun üçün ayrılmış dövlət iqamətgahında Rusiyanın xarici işlər naziri İqor İvanovu qəbul etmişdir.
Xarici işlər naziri İqor İvanov ali qonağı salamlayaraq dedi ki, Azərbaycanın dövlət başçısının bu səfəri Rusiya-Azərbaycan əlaqələrinin inkişafında böyük rol oynayacaqdır. Nazir vurğuladı ki, səfərin gedişində əldə edilmiş konkret nəticələr - mühüm dövlətlərarası sənədlərin imzalanması Azərbaycan Prezidenti Heydər Əliyevin və Rusiya Prezidenti Vladimir Putinin xidmətidir.
Azərbaycan Prezidenti HEYDƏR ƏLİYEV səmimi sözlərə görə Rusiyanın xarici siyasət idarəsinin başçısına öz minnətdarlığını bildirərək dedi:
- Çox sağ olun, İqor Sergeyeviç. Mən bu dəvətə və səfərimin belə gözəl təşkil edilməsinə, bütün görüşlərə görə ilk növbədə Vladimir Vladimiroviçə öz minnətdarlığımı bildirmək istəyirəm. Hesab edirəm ki, bütün bu görüşlər təşkilati, bizə münasibət, qonaqpərvərlik və dostluq hissləri baxımından çox gözəl keçdi. Burada hər şey ən yüksək səviyyədə təşkil edilmişdir. Bütün bunlar məndə son dərəcə məmnunluq doğurur. Lakin ən başlıcası odur ki, biz fikir mübadiləsi etdik və çox mühüm sənədlər imzaladıq. Ona görə də hesab edirəm ki, Rusiya Prezidenti Putin məni dəvət edəndə və mən buraya gələndə qarşımıza qoyduğumuz məqsədlərə prinsip etibarı ilə tamamilə nail olduq. Mən buradan böyük razılıq, minnətdarlıq, görülmüş işlərdən məmnunluq hissi ilə qayıdıram. Zənn edirəm ki, bir tərəfdən həm Rusiyaya, həm də Azərbaycana, eləcə də bütün başqa ölkələrə Rusiya ilə Azərbaycan arasında dostluq, strateji əməkdaşlıq münasibətləri olduğunu bir daha sübut etmək üçün birgə səylərlə xeyli iş gördük.
Digər tərəfdən isə, bundan sonra da uğurla işləməyimiz üçün çox şey etməyə nail olduq. Ona görə də mən çox razıyam və Prezident Vladimir Putinə və səfərin təşkilinə görə Sizə, - çünki təşkilatçılıq işi sizin xidmətinizdir, - bir daha öz təşəkkürümü bildirirəm.
Rusiyanın xarici işlər naziri İqor İvanov dedi ki, səfərin nəticələri bir tərəfdən bizi məmnun edir, digər tərəfdən isə, iki prezident arasında əldə olunmuş mühüm razılaşmaların əməli surətdə həyata keçirilməsi üçün birgə işləri gücləndirməyi tələb edir. Həm ikitərəfli münasibətlərlə bağlı, həm də bəzi beynəlxalq məsələlər var ki, onların həlli üçün birgə səylər tələb olunur. Nazir bildirdi ki, bütün bu səylər ilk növbədə Dağlıq Qarabağ münasibətinin həlli yollarının axtarılmasına yönədiləcəkdir. Rusiya bu qərarın həm Azərbaycan, region üçün, həm də Rusiyanın özü üçün əhəmiyyətini başa düşür. İqor İvanov bunu da vurğuladı ki, Qafqazda yerli münaqişələr həll edilmədən bu regionda sabitliyə və mehriban qonşuluğa nail olmaq mümkün deyildir. Rusiya həm ATƏT-in Minsk qrupu çərçivəsində, həm də ikitərəfli səviyyədə öz səylərini göstərəcəkdir.
HEYDƏR ƏLİYEV: Xatirinizdədir, dünən mən dəfələrlə qeyd etdim ki, bu, bütövlükdə respublikamız üçün, o cümlədən Rusiya ilə qarşılıqlı münasibətlərimiz, əməkdaşlığımız üçün ən əsas məsələdir. Çünki, dünən həm söhbət zamanı, həm də sonra ziyafətdə dediyim kimi, ictimaiyyətimiz Rusiyadan çox şey gözləyir. Çünki ictimaiyyətimizin və bizim hamımızın fikri belədir ki, Rusiya bu məsələni həlledici mərhələyə gətirib çıxara bilər, yəni qısa desək, Rusiya münaqişənin nizama salınmasında həlledici rol oynaya bilər. Buna görə də ictimaiyyətimizdə belə ümid var, təkcə ictimaiyyətimiz deyil, elə mən də bu fikirdəyəm. Mən buna əminəm və belə qənaətdəyəm. Buna görə də hesab edirəm ki, dünən əldə etdiyimiz razılaşmaları həyata keçirmək lazımdır və siz müsbət nəticələrə nail olmalısınız.
Görüşdə Xəzər dənizinin statusu məsələsində Rusiya ilə Azərbaycanın mövqelərinin yaxınlaşmasından məmnunluq ifadə edildi. Xarici işlər nazirlərinin müavinləri səviyyəsində Xüsusi işci qrupunun bu istiqamətdə işi davam etdirmək qərara alındı. Regional və beynəlxalq təşkilatlarda əməkdaşlığın gücləndirilməsinin, humanitar sahədə əlaqələrin genişləndirilməsinin zəruriliyi vurğulandı.
Bölmənin digər xəbərləri
