Xəbər verdiyimiz kimi Azərbaycan Respublikasının Prezidenti Heydər Əliyev Şəkidə tikintisi başa çatmış Olimpiya İdman Kompleksinin açılış mərasimində iştirak etmək üçün noyabrın 8-də ölkəmizin bu qədim şəhərinə yola düşmüşdür. 

Maşın karvanının keçdiyi rayon və kəndlərin sakinləri dövlətimizin başçısını salamlamaq, ona hörmət və ehtiramını bir daha ifadə etmək üçün yolların kənarına çıxmışdılar.

İsmayıllı şəhərinin girəcəyində, xalça sexinin qarşısında rayonun minlərlə sakini toplaşmışdı. Prezident Heydər Əliyevi müşayiət edən maşın karvanı burada dayandı. İsmayıllılar dövlətimizin başçısını böyük mehribanlıqla, hərarətlə salamladılar. Prezident HEYDƏR ƏLİYEV rayon sakinlərini səmimiyyətlə salamlayaraq, hal-əhval tutdu:

-Necəsiniz? Kefiniz, əhvalınız necədir? Təsərrüfatda işləriniz nə cürdür?

YERDƏN SƏSLƏR: Çox sağ olun, var olun, yaxşıyıq, şükür Allaha, hər şey yaxşıdır. Allah canınızı sağ eləsin. Hər şey qaydasındadır.

Cənab Prezident, torpağı şumlamışıq, toxum səpmişik.

HEYDƏR ƏLİYEV: Hərənin öz torpağı var, öz mal-qarası var? Kəndlərdə evlər tikilir?

YERDƏN SƏSLƏR: Bəli var. Evlər tikilir, hər şey yaxşıdır.

ƏHLİMAN TAĞIYEV (rayon icra hakimiyyətinin başçısı): Cənab Prezident, icazənizlə məlumat vermək istəyirəm. İsmayıllı rayonunda 200 min başdan çox davar, 70 min başa yaxın qaramal var. Əhalimizin sayı 76 minə yaxındır. Adambaşına təxminən bir qaramal düşür.

HEYDƏR ƏLİYEV: Əhaliniz 70 mindir?

ƏHLİMAN TAĞIYEV: Cənab Prezident, 76 min nəfərə yaxındır. Sizin apardığınız uğurlu aqrar islahatlar nəticəsində bu il 66 min tondan çox taxıl götürüblər. Gələn il bundan da çox məhsul gözlənilir. Çünki, aparılan işlər uğurlu nəticə əldə etməyə əsas verir. Keçən ilin müvafiq dövrü ilə müqayisədə bu il əlavə 5 min hektar sahədə səpin aparılıbdır. 4 min hektardan çox sahədə də şum aparmışıq.

Cənab Prezident, aqrar islahatlar sayəsində çox uğurlu nəticələr əldə olunur. Amma kənd təsərrüfatından əldə edilən məhsulları satmaq üçün rayonda geniş yerlər lazımdır.

HEYDƏR ƏLİYEV: Bəs nə üçün bunu etmirsiniz?

ƏHLİMAN TAĞIYEV: Cənab Prezident, sosial-iqtisadi inkişafla bağlı müvafiq proqram hazırlanıbdır.

HEYDƏR ƏLİYEV: Bu işdə sizə bir kömək lazımdırmı, yoxsa özünüz görməlisiniz?

ƏHLİMAN TAĞIYEV: Proqram təqdim olunubdur, işlər artıq gedir. Sizin tapşırığınız və tövsiyələrinizlə rayonumuzda xeyli abadlıq və təmizlik işləri aparılıbdır. Camaat buradadır, yəqin ki, onlar özləri də deyərlər. Bu işlər davam etdirilir. Yeni layihələrimiz var. Şəhərimizdə bir balaca su problemi də var. Mütəxəssislər gəldilər, birlikdə işlədik, təkliflərimizi təqdim etmişik. 1 milyard manatadək vəsait lazımdır ki, təxminən 6,5 kilometrlik məsafədən yeni su xətti çəkilsin.

HEYDƏR ƏLİYEV: Rayon mərkəzinə su xətti çəkmək istəyirsiniz?

ƏHLİMAN TAĞIYEV: Şəhərin üst hissəsində təzə evlər inşa olunubdur. Əvvəlki su xətti tələbatı tam təmin etmir.

HEYDƏR ƏLİYFV: Şəhərin üst hissəsi bu gördüyümüz yerdir?

ƏHLİMAN TAĞIYEV: Bəli. Orada yaşayanların su təchizatında bir az problem var. İstəyirik ki, yeni su kəməri çəkək və onu şəhərin həmin hissəsi ilə birləşdirək. Bununla da problem tamamilə aradan qaldırılar.

Cənab Prezident, sosial problemlərin həllində də xeyli irəliləyiş var. Şəhərin mərkəzinə qaz verilibdir, elektrik enerjisi ilə təchizat son vaxtlar yaxşılaşıbdır. Əhalimiz də bilir ki, şəhərə qaz verilməsi İlham müəllimin təşəbbüsü ilə olubdur. Onun göstərdiyi bu qayğını yerlərdə çox yüksək qiymətləndirirlər. Rayonun qazla təmin olunması çox böyük nailiyyətdir.

HEYDƏR ƏLİYEV: Keçmişdə sizin üzümünüz çox idi. İndi baxıram ki, üzüm bağları yoxdur, ya azalıbdır.

ƏHLİMAN TAĞIYEV: Demək olar ki, yoxdur. Kimlərsə, həyətyanı sahələrində fərdi qaydada saxlayıbsa, onlarda var. İvanovkada isə, onlar...

HEYDƏR ƏLİYEV: İvanovka öz yerində. Onlar hər şeyi saxlayıblar. Üzümçülüyü də, taxılçılığı da, kolxozu da saxlayıblar. Mən onlara icazə vermişəm, onlarla işiniz olmasın. Onlar orada hər şeyi yaxşı edirlər, yaxşı yaşayırlar. Kənddə camaat yaxşı yaşayır. İşiniz olmasın, kömək edin.

Demək, taxıl əkirsiniz, ondan başqa bitki yoxdur?

ƏHLİMAN TAĞIYEV: Cənab Prezident, bizdə meyvə də var. Bu il rayonumuzda 8 min tondan çox meyvə yığılıbdır.

HEYDƏR ƏLİYEV: Almadır, nədir?

ƏHLİMAN TAĞIYEV: Təkcə alma deyil, müxtəlif meyvələrdir. Emal müəssisəmiz olsa, meyvə bundan da çox olar. Məsələn, bizim meşələrdə də çoxlu meyvə var.

HEYDƏR ƏLİYEV: Elə onu soruşmaq istəyirdim. Sizin meşələrdə çoxlu meyvə var.

ƏHLİMAN TAĞIQEV: Camaat onu yığı bilmir. Elə rayonun özündə emal müəssisəsi yaradılsa...

HEYDƏR ƏLİYEV: Daha sizə emal müəssisəsini dövlət yaratmayacaqdır. İndi sizdə bu qədər adamlar var, taxıl əkirsiniz, hər nəfərə bir qaramal düşür. Bunun özü böyük bir şeydir. Keçmişdə, sovet dövründə belə bir şey olmayıbdır. Bilmirəm, sovet dövründə burada nə qədər iri buynuzlu mal-qara olubdur.

ƏHLİMAN TAĞIYEV: Cənab Prezident, 25-30 min başa yaxın idi.

HEYDƏR ƏLİYEV: 25-30 min baş, amma indi 70 min başdır. Davar əvvəllər 100 min baş olubdur, indi 200 min başa yaxındır. Amma bunun keyfiyyəti başqa cürdür. O vaxt kolxoz-sovxozda olanda inəyin çəkisi də elə deyildi. Bu qədər süd, bala da vermirdi. Bir tərəfdən, yaxşı baxmırdılar. Mən özüm o illər respublikaya rəhbərlik eştmişəm, nailiyyətlərimiz olub, amma o dövrün qüsurlarını da bilirəm. İkinci tərəfdən isə, belə də olmalı idi. O vaxt adamlar kolxozda işləyirdilər, amma işləməyənlər də vardı. Hesabdardı, nə bilim, onun köməkçisi idi, kolxoz sədri idi, onun müavini idi, briqadir idi və sair -bunların hamısı da gərək o adi kolxozçudan çox yeyəydi. Elədirmi? Burada belələri var, bilirlər ki, keçmişdə necə olubdur. Ona görə də, məsələn, biz çalışırdıq ki, qaramalın çəkisi, nə bilim, filan qədər olsun, bunu edə bilmirdiniz. Nəzərdə tuturduq ki, hər inəkdən filan qədər bala alınsın, ala bilmirdiniz. O vaxt çobanlar var idi, biz onları irəli çəkmişdik. Yüz qoyundan 130, nə bilim 140 bala almaq böyük nailiyyət idi.

Amma indi mal-qaraya özü baxır, balasını da özü alır, onun inəyi də ətli olur, sonra danası da ətli olur, qoyunu da, keçisi də, hamısı... Çünki hamısı özünündür. Torpaqda da canla-başla işləyir. Çünki özü üçün işləyir, başqa adam üçün işləmir. Biz kənd əhalisini bütün vergilərdən azad etmişik. Torpaq vergisindən savayı, heç bir vergi vermirsiniz. Mən 3-4 il bundan qabaq Fərman verdim, vergidən azad etdim. Ona görə də indi, əlbəttə ki, gəlir əvvəlkindən qat-qat artıqdır. Sən burada çox gözəl dedin, biz bu islahatları, torpaq islahatını ondan ötrü keçirmişik.

İndi sən deyirsən, müəssisə lazımdır ki, meyvəni emal etsin. Meşədə çoxlu meyvələr var, onlar toplansın, emal olunsun. Müəssisəni artıq dövlət yaratmayacaqdır. Müəssisəni sizin bax, bu sahibkarlar ki, var - kiçik və orta sahibkarlar, bunların biri, yaxud ikisi-üçü bir yerə yığışıb, pul qoyub o müəssisəni tikib yaratsın, işlətsin, məhsulu emal etsin, həmin emaldan gəlirini, pulunu götürsün. Bunun yolu budur. Bunu da etmək çətin deyildir. Amma mən bilirəm, sizin insanların çoxu hələ bu sahibkarlıq keyfiyyətini əldə edə bilməyibdir. Bunu öyrənə bilməyiblər.

Yadımdadır, mən bir müddət Naxçıvanda işləyəndə, 1991-1992-ci illərdə, 1993-cü ildə mən özüm, qanun-zad olmadan, bəzi dağ kəndlərində kolxozları ləğv etmək istəyirdim. Bir-İki dağ kəndinə getmişdim. Görürdüm ki, orada kolxoz heç nə vermir. Camaatı yığdım və dedim ki, kolxozu ləğv etmək istəyirəm. Mənə dedilər ki, yox, ləğv etmə. Soruşurdum, niyə? Mənə dedilər ki, bu, kolxozun gözətçisidir, heç olmasa, filan qədər maaş alır. Amma o, başa düşmürdü ki, kolxozu ləğv edəndə qazancı ondan çox alacaq. Daha gəlib gözətçi durmayacaq, gedib torpaqda işləməlidir, mal-heyvan saxlamalıdır. Keçmişin bu psixologiyası hələ insanlarda yaşayır. Amma daha bundan ayrılmaq lazımdır. Gərək hər kəs çalışsın ki, öz həyatını yaxşı qurmaq üçün şəxsi mülkiyyəti ilə, şəxsi zəhməti ilə zənginləşsin. Özünə daha da yaxşı şərait yaratmaq, yaxşı ev tikmək, uşaqlarına yaxşı şərait yaratmaq üçün zənginləşsin, eyni zamanda, sahibkar olsun, iş görsün.

İsmayıllı çox yaxşı rayondur, mən buranı yaxşı tanıyıram, əhalisi çox zəhmətkeşdir. Azərbaycana rəhbərlik etdiyim o illərdə mən bu rayondan bir dənə də olsun mənfi şey eşitməmişdim. Təbiəti yaxşıdır, bütün ətrafı gözəl meşələr, çaylardır. İndi Allah sizə belə gözəl bir yer nəsib edibdir. Vaxtilə torpaq, mal-heyvan əldən alınmışdı, gərək kolxozda işləyəydin, pul alaydın... Bunlar artıq getdi. İndi hamıya sərbəstlik verilibdir. Ona görə də mən sənə məsləhət görürəm ki, rayondan 10-15 bacarıqlı adam tap. Elə adamlar tap ki, öz şəxsi mülkiyyəti ilə müəyyən qədər kapital qazanıblar. Onlara kömək et, lazım olsa, deyərəm, bizdən də kömək edərlər.

Məsələn, meyvə emalı müəssisəsi yaratsınlar, başqaları yığışsın, ayrı müəssisə yaratsınlar. Çünki siz buradakı gözəl meyvələrinizin hamısını aparıb bazarda sata bilməyəcəksiniz. Amma emal edib, onlardan gözəl konservlər, şirələr və sair hazırlayıb satanda, onun qiyməti xeyli artacaqdır. Amma təkcə meyvə deyil, başqa məhsulları da emal etmək olar. Sən su çəkmək deyirsən, ona kömək etmək olar. Ancaq gəlib müəssisə tikmək, yox, dövlət daha bu işlərlə məşğul olmur və olmayacaqdır. Biz hər şeyi xalqa vermişik. Xalqa, əhaliyə vermişik. Kimin bacarığı var, gəlsin, ortaya çıxsın, müəssisə də yaratsın, zavod da yaratsın, fabrik də yaratsın, sahibkar olsun.

Siz bilirsiniz ki, mən aprel, may aylarında sahibkarlarla böyük görüşlər keçirdim. Onları dinlədim, dərdlərini öyrəndim. Ondan sonra geniş təhlil apardım və Azərbaycanda kiçik və orta sahibkarlığın inkişaf etdirilməsi üçün 7-8 böyük fərmanlar verdim. O fərmanlarda sahibkarlar üçün güzəştlər nəzərdə tutulubdur. Lazımdır ki, siz burada bunları təbliğ edəsiniz. Hər rayonun gərək özünün sahibkarlar qrupu yaransın. Elədirmi?

ƏHLİMAN TAĞIYEV: Cənab Prezident, bəli, elədir.

HEYDƏR ƏLİYEV: Mənə nə sözünüz var?

YERDƏN SƏSLƏR: Sizə cansağlığı arzulayırıq. Sağ olun, Allah Sizdən razı olsun.

HEYDƏR ƏLİYEV: Siz bizim hökumətin siyasətini, mənim siyasətimi bilirsiz?

YERDƏN SƏSLƏR: Bilirik və dəstəkləyirik.

HEYDƏR ƏLİYEV: Bəyənirsiz?

YERDƏN SƏSLƏR: Bəyənirik.

HEYDƏR ƏLİYEV: Bəlkə bir etirazınız var?

YERDƏN SƏSLƏR: Xeyr.

HEYDƏR ƏLİYEV: Biz dövlətin işlərini düz aparırıq, yoxsa yox?

YERDƏN SƏSLƏR: Düz aparırsınız, əla...

HEYDƏR ƏLİYEV: Səmimi deyirsiniz?

YERDƏN SƏSLƏR: Bəli, səmimi deyirik, ürək sözümüzdür.

HEYDƏR ƏLİYEV: Bu, hamının fikridir?

YERDƏN SƏSLƏR: Bəli, hamının fikridir.

HEYDƏR ƏLİYEV: Mən də 9 ildir ki, Prezident kimi Azərbaycana rəhbərlik edirəm, amma Prezident deyəndə, hamı elə bilir bu, asan işdir. Bilirsinizmi, Prezident nə qədər çox əziyyət çəkir? Siz onu bilmirsiniz. Heç bilə də bilməzsiniz. Hər şey mənim üzərimdədir: həm xarici siyasət, həm daxili siyasət, həm Ermənistan-Azərbaycan münaqişəsinin aradan götürülməsi, işğal olunmuş torpaqlarımızın azad edilməsi, ordunun qurulması, nə qədər işlər var... Amma mən sizə deyə bilərəm ki, Azərbaycanda iqtisadiyyat ilbəil inkişaf edir, insanların rifah halı yaxşılaşır, qarşıya qoyduğumuz vəzifələrin hamısını yerinə yetiririk və güman edirəm ki, bundan sonra daha da yaxşı olacaqdır. Ölkənin gəlirləri artır, bilirsiniz ki, biz neft strategiyasını həyata keçiririk, indi bundan böyük gəlirlər alırıq və gələcəkdə daha da çox gəlir alacağıq. Xarici ölkələrin şirkətləri gəlib Azərbaycanda fəaliyyət göstərirlər. Bunlardan da ölkəmiz, təbiidir ki, öz mənfəətini götürür. Bu işlərin hamısını qurmuşuq və respublikamız, yəni ölkəmiz artıq müstəqil bir dövlət kimi yaşayır. Biz indi müstəqilik, azadıq, heç kəsdən asılı deyilik, azərbaycanlıyıq, Azərbaycan xalqıyıq, millətiyik. Bizim öz torpağımız, ölkəmiz var və bu ölkədə hamımız yaşayırıq. Bundan sonra da və daha da yaxşı yaşayacağıq.

Mən sizin hamınıza cansağlığı, səadət, bütün işlərinizdə uğurlar arzu edirəm və ümidvaram ki, sizin də hər birinizin, hər bir ailənin işləri get-gedə yaxşı olacaqdır. Sağ olun.

YERDƏN SƏSLƏR: Cənab Prezident, Sizə yaxşı yol arzulayırıq.

X X X

İsmayıllıda olduqca səmimi keçən görüşdən sonra Prezident Heydər Əliyevi müşayiət edən maşın karvanı respublikamızın daha bir dilbər guşəsi olan Qəbələ rayonuna yola düşdü. Yolboyu kəndlərin əhalisi xalqımızın və müstəqil dövlətimizin etibarlı gələcəyinin təminatçısı, dünya şöhrətli siyasi xadim Heydər Əliyevi qarşılamağa çıxmışdı.

Maşın karvanı Qəbələ rayonunun iri yaşayış məntəqələrindən olan Vəndam kəndində dayandı. Qəbələ şəhərinin, yaxın kəndlərin yüzlərlə sakini, Vəndam camaatı, o cümlədən ağsaqqallar Azərbaycan Prezidentini böyük ehtiram və məhəbbətlə qarşıladılar. İnsanlar hədsiz sevinclərini gizlətmədən dövlətimizin başçısını ürəkdən salamlayır, onlarla görüşdüyünə görə dönə-dönə minnətdarlıqlarını bildirirdilər.

KƏND AĞSAQQALI: Cənab Prezident, xoş gəlmisiniz! Allah canınızı saf etsin, uzunömürlü olasınız!

HEYDƏR ƏLİYEV: İlham müəllimi tanıyırsınız da.

KƏND AĞSAQQALI: İlham müəllim bizim ürəyimizdir.

HEYDƏR ƏLİYEV: Necəsiniz, nə var, nə yox? Bura rayonun mərkəzidir, yoxsa?

YERDƏN SƏSLƏR: Xeyir, bura Vəndam kəndinin mərkəzidir. Bu kəndin 8 min əhalisi var. 7 kəndi əhatə edir.

HEYDƏR ƏLİYEV: 8 min ? Mənimlə görüşə gəldiyinzə görə sağ olun, təşəkkür edirəm. Mən sizin hamınızı salamlayıram. Hamınıza xoş arzularımı, hörmət-ehtiramımı bildirirəm.

YERDƏN SƏSLƏR: Çox sağ olun, biz Sizə çox minnətdarıq.

HEYDƏR ƏLİYEV: Görürəm, Vəndam böyük kənddir, 8 min əhalisi var, eyni zamanda çox gözəl təbiəti olan bir yerdir. Mən keçmişdə də bu yolla gəlmişəm. Yəqin ki, bilirsiniz, vaxtilə bu yolun açılmasını da mən təmin etdim. Yadınızdadırmı? 1980-ci illərdə mən təmin etdim. Əvvəllər bu yol yox idi. Siz o biri yolla Bakıya gedirdiniz.

YERDƏN SƏSLƏR: Bəli, Ağdaşdan, Göyçaydan Bakıya gedirdik.

HEYDƏR ƏLİYEV: Ağdaşdan, Göyçaqdan keçib Bakıya gedirdiniz. Yolunuz nə qədər uzaq olurdu. Elədirmi? Biz bu yolu açdıq, bir neçə körpü tikdik, burada işlədiyim əvvəlki dövrün son illəri -1981-1982-ci illər idi. Mənim yadımdadır, bu yolun çəkilməsini xahiş etmişdilər, mən də bunu etdim. İndi Bakıya yolunuz qısalıbdır. Özü də yol belə gözəl meşənin içindən keçir. Adam baxır, deyir ki, burada təbiət nə gözəldir. Siz belə bir yerdə yaşayırsınız. Belə yerdə yaşayan adamlar da həm fiziki cəhətdən, həm də əqli cəhətdən sağlam olur, həm də ki, zəhmətkeş, fədakar olur, elədirmi?

KƏND AĞSAQQALI: Mənim yaşım 90-dan yuxarıdır.

HEYDƏR ƏLİYEV: 90-dan yuxarı yaşın var... A kişi, nə danışırsan?

KƏND AĞSAQQALI: Bəli, adım da Süleymandır. Əmirov Süleyman Mikayıl oğlu.

HEYDƏR ƏLİYEV: Maşallah!

SÜLEYMAN ƏMİROV: Biz həmişə Sizə duaçıyıq.

HEYDƏR ƏLİYEV: Övladın var?

SÜLEYMAN ƏMİROV: Var. Nəvəm də var, cəbhə bölgəsindədir, mayor rütbəsindədir, 400-500 əsgəri var.

HEYDƏR ƏLİYEV: Maşallah. Çox sağ ol. Təşəkkür edirəm ki, nəvən cəbhə bölgəsindədir. 90 yaşında... Bəlkə mən də gəlib burada yaşayım, 90 yaşa qədər çatım. Sizin əkdiyiniz nədir, taxıldır?

YERDƏN SƏSLƏR: Taxıldır, qarğıdalıdır.

HEYDƏR ƏLİYEV: Mal-qaranız var?

YERDƏN SƏSLƏR: Var.

HEYDƏR ƏLİYEV: İndi kolxoz, sovxoz ləğv olundu. Vaxtilə, o illərdə mən işləyəndə, yadınızdadır, bunların hamısı vardı. İndi hər şey dəyişilibdir. Biz müstəqil olduq, bazar iqtisadiyyatı yolu ilə gedirik. Şəxsi mülkiyyəti təmin etmişik, torpağı, mal-qaranı kəndlilərə paylamışıq, insanlara sərbəstlik vermişik. Kim bundan istifadə etməyi bacarırsa, işləyirsə, vəziyyəti də yaxşıdır. Amma kim bunu bacarmırsa...

Keçmişdə, bizim o sistemdə, - mən özüm 25-30 il həmin sistemin rəhbəri olmuşam, - belə idi ki, 15-i işləyirdi, 15-i də onların hesabına yaşayırdı. Elədirmi? İndi o yoxdur. İndi hər şey insanların özünə verilibdir. Kim bunlardan istifadə edə bilirsə, yaxşı yaşayır. Kim istifadə edə bilmirsə, yaxşı yaşamır. O ki qaldı rayon mərkəzlərinə, şəhərlərə, bəli, buralarda torpaq, heyvan yoxdur, belə yerlərdə işsizlik var, bu, təbiidir. Bunun da səbəbləri var. Amma biz çalışırıq ki, rayon mərkəzlərində, şəhərlərdə iş yerləri açaq. Bu da asan deyildir. Çünki indi dövlət müəssisələrini yaratmaq olmaz. Olanların da, bilirsiniz ki, bir hissəsi dağılıb getdi, bir hissəsi istənilən səviyyədə işləmir. Çünki onların hamısı sovet sosialist sisteminə uyğunlaşdırılmışdı. İndiki bazar iqtisadiyyatı şəraitində və bütün başqa ölkələrlə, yəni kapitalist ölkələri ilə əlaqələrə girmişik, biz onların yaşadıqları kimi yaşamalıyıq və yaşamaq istəyirik. Ona görə də, əlbəttə ki, indi çətinliklər var.

ASİF HAŞIMOV (kənd bələdiyyəsinin başçısı): Cənab Prezident, Sizə məlumat üçün bildirmək istəyirəm ki, islahatdan əvvəl kəndimizdə 6 kombayn vardı, indi 8 kombayn var. Qonşu kənddə iki xarici kombayn da var. Taxıl yığımı zamanı kombayn sarıdan bir az çətinlik olur, amma təcili də aradan qaldırılır. Yadıma gəlir ki, kolxoz dövründə biçin kampaniyası avqust ayının axırına qədər davam edirdi. İndi biçin iyulun ortalarında qurtarır. Keçən il Qəbələ rayonu 42 min ton taxıl istehsal etmişdi. Bu il də Qəbələnin ehtiyacını ikiqat, üçqat ödəyəcək taxılımız var.

HEYDƏR ƏLİYEV: Qəbələ rayonu nə qədər taxıl verir?

ASİF HAŞIMOV: Keçən il 42 min ton taxıl istehsal etmişik. Bu il isə üç ay dalbadal yağış yağdığına, hava şəraiti əlverişsiz keçdiyinə görə taxıl qismən az oldu. Amma Qəbələ camaatının ehtiyacından çoxdur. Burada çörək problemi yoxdur. Camaat arzu edərdi ki, burada turizmin inkişafı sahəsində iş görülsün. Bizim çox gəzməli, görməli yerlərimiz var. O yerlərə müəyyən investisiya qoyulsa, özümüz də bacardıqca kömək edib problemləri aradan qaldıracağıq. Hər halda, kəndimizin 4-5 il bundan əvvəlki vəziyyəti ilə bugünkü görünüşünü müqayisə edənlər bilirlər ki, burada gündən-günə inkişaf var. İndi bizim kəndimizdə mobil telefon xidmətindən istifadə etmək üçün gördüyünüz bu qurğu da quraşdırılmışdır. Bu AZƏRCELL rabitə xidməti üçündür.

HEYDƏR ƏLİYEV: Bu, sənin cib telefonun üçündür? Burada neçə adamda cib telefonu var?

ASİF HAŞIMOV: Kəndimizdə 400-500 nəfərdə cib telefonu var.

HEYDƏR ƏLİYEV: Bir kənddə?

YERDƏN SƏSLƏR: Bəli.

HEYDƏR ƏLİYEV: Əhalinin vəsaiti olmasa, cib telefonu saxlaya bilər?

Məsələlər var, bunları həll etmək olar. Məsələn, televiziya ötürücüsü məsələsini həll etmək mümkündür. Elektrik enerjisində bir neçə ildir ki, çətinliklər var. Amma siz təsəvvür edin, əgər vaxtilə biz- bunu deyirəm ki, siz bir də biləsiniz, bunları əvvəllər Azərbaycanda işləyəndə mən özüm etmişəm,- böyük elektrik stansiyalarını tikməsəydik, Sovet İttifaqı dağılandan və biz müstəqil olandan sonra elektrik enerjimiz heç olmazdı. O vaxtlar tikmişik, indi onlardan istifadə olunur. Ancaq onların bəziləri artıq köhnəlir, bəzisini təmir etmək lazımdır. Amma siz indi az-çox elektrik enerjisi alırsınız. Pulunu verirsinizmi?

YERDƏN SƏSLƏR: Qismən veririk.

HEYDƏR ƏLİYEV: Amma siz bilməlisiniz ki, Azərbaycan üzrə bütün əhali işıq və qaz pulu, su pulu vermədiyinə görə, hökumət məcbur olur ki, büdcədən 350 milyon dolları həmin elektrik enerjisini istehsal etmək, qaz almaq üçün, - biz qazı Rusiyadan da alırıq,- su üçün vəsait ayırır. Gələn il üçün bizim büdcəmizin ümumi həcmi 1 milyard 200 milyon dollar nəzərdə tutulur. İndi təsəvvür edin, əgər biz qaz, işıq, su pulunu əhalidən ala bilsəydik, bu 350 milyon dolları biz ora xərcləməzdik, camaatın vəziyyətinin yaxşılaşdırılmasına yönəldə bilərdik. Siz bilməlisiniz, biz elektrik enerjisini istehsal edirik, onun dəyərinin əksər hissəsini ala bilmirik. Təbii qazı Rusiyadan da alırıq, paylayırıq, pulunu yığa bilmirik. Keçid dövrünün bu cür çətinlikləri var. Sizin kəndə qaz gəlir, yoxsa yox?

YERDƏN SƏSLƏR: Rayon mərkəzinə qaz gəlir.

HEYDƏR ƏLİYEV: Mənə dair başqa sözünüz varmı?

YERDƏN SƏSLƏR: Sizin sağlığınızı istəyirik, yolunuz açıq olsun! Bizimlə görüşdüyünüzə görə çox sağ olun.

HEYDƏR ƏLİYEV: Yaxşı, bu dediyiniz sözlərdən savayı, hökumətə deyiləsi sözünüz, hökumətin fəaliyyəti haqqında nə kimi fikriniz var?

YERDƏN SƏSLƏR: Qəbələ rayonunda tütün istehsalına kömək etmək lazımdır.

HEYDƏR ƏLİYEV: Keçmişdə tütün fabrikləri vardı. Onlar bu tütündən o keyfiyyətdə siqaret istehsal edə bilmirlər. Buna görə vəziyyət belədir. Başa düşürsünüzmü? Amma bununla mən onu demək istəmirəm ki, biz çıxılmaz vəziyyətdəyik. Biz məsələləri həll edəcəyik. Amma bunun səbəblərini bilməlisiniz. Səbəbləri nədir? Əvvəllər, sovet vaxtı, ola bilərdi ki, adamların 1 faizi xarici siqaret çəkirdi. İndi kimi görürsən, xarici siqaret çəkir. Ona görə siz bunları bilməlisiniz. Amma mən də bilirəm. Bu işləri vaxtilə mən təşkil etmişəm. Mən 1969-cu ildə Azərbaycanda rəhbər işə başlayanda ildə cəmi 8 min ton tütün istehsal olunurdu. Mən isə onu 50 min tona qaldırdım. Başa düşürsünüzmü? Bu sahədən də çoxlu gəlir götürülürdü. Tütündən gələn gəliri başqa sahələrin heç birindən almaq mümkün deyildi. Çalışacağıq ki, bunları da həll edək. Siz öz imkanlarınızdan maksimum istifadə etməyə çalışın, biz bu dövrü keçəcəyik və hamı üçün hər şey yaxşı olacaqdır. Baxıram, maşallah, hamınız sağ-salamatsınız, gümrahsınız, gözəlsiniz. Ac-susuz yoxdur.

YERDƏN SƏSLƏR: Ömrünüz uzun olsun, sağ olun.

HEYDƏR ƏLİYEV: Arzularınıza görə çox sağ olun, sizə təşəkkür edirəm. Mən də çalışacağam ki, sizin bu dualarınız yerinə yetsin, ömrüm uzun olsun, bundan sonra sizinlə birlikdə daha da çox işlər görək. Sağ olun. Təşəkkür edirəm.

YERDƏN SƏSLƏR: Cənab Prezident, sağ olun, Sizə uzun ömür, cansağlığı, yaxşı yol arzulayırıq.

X X X

Vəndam kəndinin sakinləri Prezident Heydər Əliyevlə mehribanlıqla sağollaşdılar.

Dövlətimizin başçısı Heydər Əliyev elə həmin gün axşam Şəkiyə gəldi.

AZƏRTAC

Foto Rafiq Bağırovundur