AZƏRBAYCAN PREZİDENTİ İLHAM ƏLİYEV “CASPİAN OUTLOOK-2008” BLED STRATEJİ FORUMUNDA İŞTİRAK ETMİŞDİR
AZƏRTAC-ın xüsusi müxbiri xəbər verir ki, avqustun 27-də Sloveniyanın Bled şəhərindəki “Golf” mehmanxanasında “Caspian Outlook-2008” Bled Strateji Forumu işə başlamışdır. Forumda əsas diqqət enerji ehtiyatlarının Xəzər regionundan Qərbi Avropaya nəqli məsələlərinə yönəlmişdir.
Sloveniya hökuməti tərəfindən təşkil olunmuş və dünyanın işgüzar dairələrinin 180-dən çox nüfuzlu nümayəndəsinin, 20-dən çox ölkənin rəsmi nümayəndələrinin, eləcə də beynəlxalq təşkilatların təmsilçilərinin, region ölkələrinin tanınmış iqtisadçıları və siyasətçilərinin iştirak etdiyi forumu Sloveniyanın xarici işlər naziri Dimitri Rupel açdı. İki gün davam edəcək bu forumu strateji maraqların birləşdiyi tədbir kimi dəyərləndirən nazir praktik əməkdaşlığın genişləndirilməsi, Avropada enerji təhlükəsizliyinin təmin edilməsi baxımından faydalı olacağını vurğuladı. Nazir dedi ki, müzakirələrdə, əsasən, Xəzər dənizinin karbohidrogen ehtiyatlarının Avropaya çatdırılması istiqamətində gələcək planlar nəzərdən keçiriləcək və ümumiyyətlə, Xəzər hövzəsinin enerji ehtiyatlarından istifadə Avropa üçün çox əhəmiyyətlidir. O, eyni zamanda, Xəzər hövzəsində sabitliyin bərpasının vacibliyini, enerji daşıyıcılarının Avropaya təhlükəsiz daşınması üçün birgə fəaliyyət göstərməyin zəruriliyini bildirdi.
Regional və beynəlxalq əməkdaşlığı nəzərdə tutan bu tədbirdə iştirakına görə Azərbaycan Prezidenti İlham Əliyevə təşəkkürünü bildirən Dimitri Rupel həm də Azərbaycan iqtisadiyyatının son illərdəki sürətli inkişafı barədə məlumatın əldə edilməsinə imkan yaradacaq bu forumun bütün tərəflər üçün faydalı olacağını vurğuladı.
Sloveniyanın Baş naziri Yanez Yanşa Azərbaycanın dövlət başçısının xanımı ilə birlikdə forumda iştirak etməsini yüksək qiymətləndirdi. Baş nazir strateji əhəmiyyət daşıyan forumda mühüm məsələlər barədə fikir mübadiləsinin aparılacağını, enerji sahəsində yeni imkanların açıldığını bildirdi. Enerji təhlükəsizliyinin hər bir ölkə üçün xüsusi əhəmiyyət daşıdığını vurğulayan Yanez Yanşa dedi ki, bizim gələcək məqsədimiz, vəzifəmiz Avropada enerji təhlükəsizliyini təmin etməkdir. Bu baxımdan neftin və qazın dünya bazarlarına təhlükəsiz çatdırılması, xüsusilə qaz sektorunda əməkdaşlıq etmək bizim borcumuzdur və bu, günün tələbidir.
Forumda əsas diqqəti Xəzər hövzəsinə yönəldən və bu baxımdan Azərbaycanın rolunun xüsusilə önəmli olduğunu deyən Baş nazir həm də ixracçı və idxalçı ölkələr üçün Xəzər qazının çox böyük əhəmiyyət kəsb etdiyini söylədi. Cənubi Qafqazda əməkdaşlığa xüsusi diqqət verilməsinin zəruriliyini xatırladan Yanez Yanşa iqtisadi inteqrasiyada, azad iqtisadiyyatın inkişafında, bölgədə sülhün və təhlükəsizliyin qorunmasında hamının maraqlı olduğunu bildirdi. Avropanın enerji təhlükəsizliyinin təmin edilməsində Xəzər regionunun böyük rolunu bir daha xatırladan Baş nazir Sloveniyanın 2008-ci ildə Avropa İttifaqına sədrlik edəcəyini də bildirdi, enerji sahəsi ilə bağlı görülən səmimi və qarşılıqlı surətdə faydalı əməkdaşlığa yeni təkan verəcəyini vurğuladı.
Azərbaycan Prezidenti İlham Əliyev forumda nitq söylədi.
Dövlətimizin başçısı Xəzər dənizinin enerji resurslarının hasilatı və dünya bazarlarına çıxarılmasına, xarici sərmayə qoyuluşu üçün olkəmizdə hər cür şəraitin yaradıldığını, adambaşına düşən xarici sərmayənin həcminə görə Azərbaycanın dünyada aparıcı yer tutduğunu bildirdi. Azərbaycanın enerji daşıyıcılarını dünya və Avropa bazarlarına çıxarmaq üçün həyata keçirilən qlobal layihələrdən danışan Prezident İlham Əliyev, eyni zamanda bildirdi ki, hazırda ölkəmizin nəqliyyat sisteminə güclü sərmayə qoyulur, Şərq-Qərb nəqliyyat dəhlizinin səmərəliliyinin artırılması üçün böyük işlər görülür.
Dövlətimizin başçısı Azərbaycanda böyük qaz ehtiyatlarının olduğunu xatırladaraq dedi ki, “Şahdəniz” yatağından çıxarılacaq qazın Avropaya nəqli enerji təhlükəsizliyinin təmin edilməsinə mühüm töhfə verəcəkdir. Bakı-Tbilisi-Ərzurum qaz kəmərinin işə düşməsi ilə Azərbaycan qaz ixrac edən böyük ölkəyə çevriləcəkdir.
İqtisadi inkişaf olmadan siyasi islahatları istənilən səviyyədə həyata keçirməyin mümkünsüzlüyünü vurğulayan Prezident İlham Əliyev ölkəmizdə gedən hüquqi, demokratik, dünyəvi dövlət quruculuğundan da danışdı.
Dövlətimizin başçısı daha sonra iqtisadiyyatın qeyri-neft sektorunun inkişaf etdirilməsi üçün də mühüm layihələrin həyata keçirildiyini, Azərbaycanın Avratlantik məkana inteqrasiyaya xüsusi önəm verdiyini söylədi.
Prezident İlham Əliyev Azərbaycan ərazisinin 20 faizini işğal etmiş Ermənistanın regionda sülhə və təhlükəsizliyə ən böyük maneə olduğunu vurğuladı, bu ölkənin BMT-nin məlum 4 qətnaməsinə məhəl qoymamasını beynəlxalq hüquq normalarının kobud şəkildə pozulması kimi qiymətləndirdi. Azərbaycanın məsələnin sülh yolu ilə həllinə çalışdığını vurğulayan dövlətimizin başçısı digər regionlarda da belə münaqişələrin mövcudluğunu xatırladaraq dedi ki, ölkəmiz sivilizasiyaların dialoquna həmişə tərəfdar olmuşdur.
Azərbaycan Prezidenti forumun işinə uğurlar arzuladı və bu mühüm tədbirin bütün ölkələrin iqtisadi əməkdaşlığı üçün faydalı olacağına əminliyini söylədi.
Sloveniyanın xarici işlər naziri Dimitri Rupel dərin məzmunlu nitqinə görə Prezident İlham Əliyevə təşəkkürünü bildirdi.
Bölmənin digər xəbərləri
