AZƏRBAYCAN PREZİDENTİ İLHAM ƏLİYEV POSTOYNA MAĞARASI İLƏ TANIŞ OLMUŞDUR
Prezident İlham Əliyev və xanımı Mehriban Əliyeva burada qədim Postoyna mağarası (Postoynska-yama) ilə tanış oldular.
Turizm obyekti kimi dünyada məşhur olan mağaranın menecer-direktoru Peter Ştegin dövlətimizin başçısını və xanımını böyük səmimiyyətlə qarşıladı.
Azərbaycan Prezidentinə məlumat verildi ki, mağaranın 190-160 min il tarixi var. Kaha və qalereyalardan ibarət mürəkkəb sistem təşkil edən bu karst mağarasının uzunluğu təxminən 23 kilometrdir. 1818-ci ildə mağaranın qədim hissəsi yerli sakin Luka Çeç tərəfindən açılmışdır. Burada 1872-ci ildə yeraltı dəmir yolu çəkilmişdir. Postoyna mağarası tavandan sızan su damcılarının əmələ gətirdiyi stalaktit və stalaqmitlərin gözəlliyi ilə dünyada məşhurdur. Təbiətin nadir əsəri olan bu mağaraya 1980-ci illərə qədər ildə təxminən 900 min nəfər turist gəlirdi. Sloveniya 1991-ci ildə müstəqillik qazandıqdan sonra bu rəqəm 300-400 min təşkil edir. Turist marşrutunun uzunluğu 5,2 kilometrdir. Mağarada qədim alətlər aşkar edən arxeoloqaların fikrincə, burada 50 min il əvvəl ibtidai ovçular yaşamışdır. Mağarada havanın hərarəti ilin bütün fəsillərində müsbət 10 dərəcədən çox olmur.
Prezident İlham Əliyev və xanımı Mehriban Əliyeva bu böyük “Kalvario dağı”na, “Gözəl dağ”a və yüksək akkustikası olan konfrans zalına maraqla tamaşa etdilər. Zalın tavanının hündürlüyü 40 metr, sahəsi 3 min kvadratmetrdir. Burada 10 min nəfər yerləşə bilər.
Prezident İlham Əliyev və xanımı 100 ildən bəri burada xüsusi hovuzda yaşayan “İnsan balığa” da maraqla tamaşa etdilər.
Dövlətimizin başçısı və xanımı 15-20 metr dərinlikdən axan Pivka çayına (bu çay 800 metr məsafədə mağaradan keçir) və yeraltı su kanallarına da maraqla tamaşa etdilər, kiçik dəmir yol vaqonunda mağaranı gəzdilər.
Bölmənin digər xəbərləri
