AZƏRBAYCAN PREZİDENTİ İLHAM ƏLİYEVİN NİTQİ
Hörmətli qonaqlar!
Xanımlar və cənablar!
Mən sizi Azərbaycanda bir daha ürəkdən salamlayıram. Azərbaycana xoş gəlmisiniz!
Rumıniya Prezidentinin Azərbaycana rəsmi səfəri ikitərəfli münasibətlərimizin inkişafında çox mühüm rol oynayır və artıq demək olar ki, səfər çox uğurlu olmuşdur. Bizim əlaqələrimizin çox böyük tarixi var. Hələ XV əsrdə Azərbaycan hökmdarı Uzun Həsən və rumın hökmdarı Böyük Stefan müttəfiqlik haqqında saziş imzalamışdılar. Çox görkəmli rumın alimi, məşhur dilçi Dmitri Kantemirin fəaliyyəti barədə Azərbaycanda geniş məlumatlar var idi.
Şərqdə ilk dəfə demokratik respublika - 1918-ci ildə Azərbaycan Xalq Cümhuriyyəti yarananda onun görkəmli nümayəndəsi Səməd bəy Mehmandarov Rumıniyanın ən ali mükafatı ilə təltif edilmişdi. 1920-ci ildə Azərbaycan Xalq Cümhuriyyəti süqut etdi. Azərbaycan öz dövlət müstəqilliyini itirdi. Biz yalnız 1991-ci ildə öz dövlət müstəqilliyimizi bərpa etdik. Amma buna baxmayaraq, o illərdə də rumın və Azərbaycan xalqları çox fəal əməkdaşlıq edirdi, geniş iqtisadi əlaqələr mövcud idi. İnsanlar bir-birilə ünsiyyətdə olmuşdular. Bir sözlə, bizim aramızda olan əlaqələr həmişə inkişaf edirdi və əlbəttə ki, müstəqillik bərpa olunandan sonra münasibətlər yeni mərhələyə, yeni pilləyə qalxmışdır.
1991-ci ildə Azərbaycan dövlət müstəqilliyini bərpa etdikdən sonra bizi müstəqil respublika kimi tanıyan ikinci dövlət Rumıniya olmuşdur. Son 15 il ərzində bizim aramızda əlaqələr çox sürətlə inkişaf etmişdir, siyasi- iqtisadi və humanitar sahələrdə, bütün istiqamətlərdə biz çox fəal əməkdaşlıq edirik. Biz müttəfiqik və indiki dövrdə Rumıniya-Azərbaycan münasibətləri bütövlükdə regionda gedən proseslərə çox ciddi şəkildə təsir göstərir. Qara dəniz və Xəzər dənizi regionlarının əməkdaşlığı o cümlədən Rumıniya və Azərbaycan tərəfindən aparılan siyasət nəticəsində möhkəmlənir. Bu dialoq və əməkdaşlıq bütün başqa ölkələrə öz təsirini göstərir. Bizim aramızda olan siyasi-iqtisadi əlaqələr, nəqliyyat və enerji dəhlizlərinin mövcudluğu, əlbəttə ki, regional işlərdə rolumuzu artırır.
Rumıniya Prezidentinin Azərbaycana bugünkü səfəri isə bu münasibətlərə yeni təkan verir. Bu gün çox geniş fikir mübadiləsi aparılmışdır, danışıqlar çox uğurlu keçmişdir. İmzalanmış sənədlər əlaqələrimizin hüquqi bazasının möhkəmlənməsinə şərait yaradır. Bir sözlə, əminəm ki, bizim aramızda olan əlaqələr bu səfərdən sonra daha da sürətlə inkişaf edəcəkdir.
Neft-qaz sektorunda əməkdaşlıq haqqında geniş müzakirələr aparılmışdır. Bu sahədə gələcəkdə çox böyük planlarımız var. Bizim planlarımız, bildiyiniz kimi, həyatda öz əksini tapır. Azərbaycanda həyata keçirilən neft siyasəti nəticəsində ölkəmiz, demək olar ki, qarşısında duran bütün vəzifələri uğurla yerinə yetirdi. Azərbaycanın yataqlarından hasil edilən neft və qaz dünya bazarlarına çıxarılır və çıxarılacaqdır. Beləliklə, Rumıniya bu sahədə də bizim üçün çox önəmli tərəfdaş ölkə kimi öz töhfəsini verməkdədir.
Regionda təhlükəsizlik problemlərinin həlli, o cümlədən Ermənistan-Azərbaycan, Dağlıq Qarabağ münaqişəsinin həlli barədə bizim aramızda fikir mübadiləsi aparılmışdır. Rumıniyanın mövqeyi çox müsbət mövqedir. Bu gün imzalanmış birgə siyasi bəyannamədə bu mövqe bir daha öz əksini tapmışdır. Biz bu mövqeyə görə Rumıniya Prezidentinə və rumın xalqına öz minnətdarlığımızı bildiririk.
Eyni zamanda, bu gün Azərbaycanın mədəniyyət işçiləri ilə bizim görüşümüz olubdur. Azərbaycanın mədəni həyatında çox əlamətdar hadisə baş veribdir. Dahi rumın bəstəkarı, musiqiçisi Corce Eneskunun abidəsi ucaldılmışdır. Yəni bu, bir daha onu göstərir ki, bizim aramızda olan əlaqələr dostluq, mehribanlıq əsasında qurulubdur və şübhə etmirəm ki, getdikcə daha da güclənəcəkdir.
Hörmətli cənab Prezident, mən Sizi və Rumıniya nümayəndə heyətini Azərbaycanda bir daha ürəkdən salamlayıram və bu badəni Sizin şərəfinizə, Rumıniya-Azərbaycan əlaqələrinin inkişafının şərəfinə qaldırıram!
Bölmənin digər xəbərləri
