Bakı, 16 dekabr, AZƏRTAC

Azərbaycan Respublikasının Dövlət Miqrasiya Xidməti (DMX) ilə Ukraynanın Dövlət Miqrasiya Xidməti arasında miqrasiya sahəsində əməkdaşlığa dair onlayn formatda anlaşma memorandumu imzalanıb.

DMX-dən AZƏRTAC-a bildiriblər ki, sənədi Dövlət Miqrasiya Xidmətinin rəisi Vüsal Hüseynov və Ukrayna Dövlət Miqrasiya Xidmətinin sədri Nataliya Naumenko imzalayıblar.

Memorandum iki dövlətin miqrasiya, sığınacaq və vətəndaşlıq sahəsində əməkdaşlığın hüquqi bazasını genişləndirməklə, miqrasiya proseslərinin tənzimlənməsini, sığınacaq sahəsində institusional əlaqələrin inkişafını, məlumat mübadiləsinin intensivləşdirilməsini, qabaqcıl təcrübə mübadiləsi istiqamətində fəaliyyəti özündə ehtiva edir.

Anlaşma memorandumunun imzalanması tədbirində, həmçinin mümkün əməkdaşlıq məsələlərinə toxunulub, birgə fəaliyyətin Azərbaycanda yaradılması nəzərdə tutulan Miqrasiya üzrə Regional Təlim Mərkəzinin işinə töhfə verəcəyi qeyd edilib.

Tədbirdə Azərbaycan Respublikası Xarici İşlər Nazirliyinin nümayəndəsi, DMX-nin aidiyyəti idarələrinin əməkdaşları və Ukraynanın Azərbaycan Respublikasındakı səfirliyinin nümayəndələri iştirak ediblər.