AZƏRBAYCAN RESPUBLİKASININ PREZİDENTİ CƏNAB İLHAM ƏLİYEVƏ
Biz, bu il ölkəmizin müxtəlif ali məktəblərinə ən yüksək balla qəbul olunmuş tələbələr 2004-cü il 30 sentyabr tarixli Sərəncamınızla bizi Prezident təqaüdünə layiq gördüyünüzə görə Sizə dərin təşəkkür və minnətdarlığımızı bildiririk.
Bu şərəfə layiq görülməyimizdən hədsiz sevinir, ruhlanır və qürur hissi keçiririk. Eyni zamanda, Prezident təqaüdçüsü kimi yüksək adı daşımağın böyük məsuliyyətini dərk edirik. Prezident təqaüdçüsü nəinki yüksək təhsil göstəriciləri ilə, həm də hərtərəfli dünyagörüşü, zəngin mənəvi-əxlaqi keyfiyyətləri ilə nümunə olmalıdır.
Prezident təqaüdü ümummilli liderimiz, gəncliyimizin və təhsilimizin böyük qayğıkeşi Heydər Əliyevin 2001-ci il 3 sentyabr tarixli Fərmanına əsasən təsis edilmişdir. Ulu öndərimiz bu qərarı Azərbaycanda təhsil sahəsində yüksək nəticələr əldə edən tələblərə dövlət qayğısını gücləndirmək, onların təhsil alması üçün daha əlverişli şərait yaradılmasını təmin etmək və təhsilə olan həvəslərini artırmaq məqsədi ilə qəbul etmişdir. O vaxtdan başlayaraq, hər il ali məktəblərə ən yüksək balla qəbul olan tələbələr bu şərəfli ada layiq görülürlər.
Möhtərəm Prezident! Biz tələbələr Sizin bu Sərəncamınızı Azərbaycan gənclərinə, onların təhsilinə böyük diqqət və qayğının təzahürü, böyük Heydər Əliyevin gəncliyimizə göstərdiyi atalıq qayğısının davamı kimi qiymətləndiririk. Təsadüfi deyil ki, Siz öz Sərəncamınızla Prezident təqaüdçülərinin həm sayını, həm də təqaüdlərin məbləğini artırmısınız. Bu da, əlbəttə, bizi çox sevindirir. Sizin bu qərarınızı bizə, bütövlükdə gənclərə bəslədiyiniz qayğıkeş, humanist münasibətin ifadəsi kimi dəyərləndiririk. Bizə göstərdiyiniz bu diqqət, qayğı və etimada görə, qəbul imtahanlarında yaratdığınız ədalətli, obyektiv şəraitə görə Sizə bir daha dərin minnətdarlığımızı bildiririk.
Ulu öndərimiz Heydər Əliyev 2001-ci ildə ilk Prezident təqaüdçüləri ilə görüşdə belə bir tövsiyə etmişdir: “Çox arzu edərdim ki, Prezident təqaüdünə layiq görülən gənclər yaxşı nəticələrlə universitetlərə daxil olduqları kimi, ondan da yaxşı nəticələrlə universitetləri bitirib həyat fəaliyyətinə başlasınlar”.
Cənab Prezident! Biz bütün gücümüzlə çalışacağıq ki, ümummilli liderimizin bu tövsiyəsini tələbəlik fəaliyyətimizdə doğruldaq, özümüzü gələcəyə həqiqi peşəkarlar kimi, xalqımıza, Vətənimizə layiqincə xidmət etməyə qadir yüksək ixtisaslı mütəxəssislər kimi hazırlayaq.
2004-2005-ci tədris ilində ali məktəblərə
ən yüksək balla qəbul olmuş və Prezident
təqaüdünə layiq görülmüş tələbələr
Bölmənin digər xəbərləri
