AZƏRBAYCAN RESPUBLİKASININ PREZİDENTİ İLHAM ƏLİYEV CENEVRƏYƏ GƏLMİŞDİR
Prezident İlham Əliyevi hava limanında, zirvə görüşünün protokoluna uyğun olaraq, Cenevrə kantonunun naziri, İsveçrənin BMT və digər beynəlxalq təşkilatlar yanında daimi nümayəndəsi Jan Mark Vuqari, BMT-nin regional bölməsinin rəhbərləri, Azərbaycan Respublikasının Almaniya və İsveçrədəki səfiri Hüseynağa Sadıqov, ölkəmizin BMT və digər beynəlxalq təşkilatlar yanında daimi nümayəndəliyinin müvəqqəti işlər vəkili Murad Nəcəfov və digər rəsmi şəxslər böyük hörmətlə qarşıladılar.
Azərbaycan Prezidenti İlham Əliyev hava limanından onun üçün ayrılmış iqamətgaha yola düşdü.
X X X
Azərbaycan Prezidenti İlham Əliyev günün ikinci yarısında Cenevrənin Palekspo sarayına gəldi.
Burada zirvə görüşündə iştirak etmək üçün gəlmiş dövlət və hökumət başçıları, habelə BMT-nin strukturlarının rəhbərləri üçün İsveçrə konfederasiyası və Cenevrə kantonu tərəfindən qeyri-rəsmi qəbul təşkil olundu. Prezident İlham Əliyev qəbulda iştirak etdi.
Birləşmiş Millətlər Təşkilatının və Beynəlxalq Telekommunikasiya İttifaqının təşkil etdikləri İnformasiya Cəmiyyəti üzrə Dünya Sammitini iki mərhələdə keçirmək nəzərdə tutulmuşdur. Bu il dekabrın 10-12-də Cenevrədə Sammitin birinci mərhələsi, 2005-ci ilin noyabrında isə Tunisdə ikinci mərhələsi keçiriləcəkdir.
AZƏRBAYCAN PREZİDENTİ İLHAM ƏLİYEVİN BMT-NİN BAŞ KATİBİ KOFİ ANNAN İLƏ GÖRÜŞÜ
İnformasiya Cəmiyyəti üzrə Dünya Sammitində iştirak etmək üçün Cenevrədə səfərdə olan Azərbaycan Respublikasının Prezidenti İlham Əliyevin dekabrın 9-da, zirvə görüşünün keçiriləcəyi Palekspo sarayında Birləşmiş Millətlər Təşkilatının Baş katibi Kofi Annan ilə təkbətək görüşü olmuşdur. BMT-nin Baş katibi Prezident İlham Əliyevi Azərbaycanın dövlət başçısı seçilməsi münasibətilə ürəkdən təbrik etdi, bu məsuliyyətli vəzifədə ona uğurlar dilədi. Prezident İlham Əliyev bildirdi ki, ölkəmizdə keçid dövrünün öz problemləri olsa da, Ermənistan-Azərbaycan, Dağlıq Qarabağ münaqişəsi onu ən çox düşündürən məsələ, Azərbaycanın ən ağrılı problemidir. Cənab Kofi Annan dedi ki, bu münaqişənin hərbi yolla həlli regionda qeyri-sabitliyi gücləndirə bilər, ona görə də problemin sülh yolu ilə aradan qaldırılması məqsədəuyğundur. Azərbaycan Prezidenti münaqişənin həllində vasitəçilik edən ATƏT-in Minsk qrupunun fəaliyyətinin heç bir nəticə vermədiyini təəssüflə xatırladaraq vurğuladı ki, BMT, digər beynəlxalq təşkilatlar münaqişəyə son qoyulması ilə bağlı qəti sözlərini deməlidir. Azərbaycan Prezidenti donorların respublikamızdakı qaçqınlara və məcburi köçkünlərə humanitar yardımı azaltmasından narahatlığını da söylədi. Eyni zamanda bildirdi ki, Azərbaycan hökuməti qaçqınların və məcburi köçkünlərin ehtiyacları üçün Neft Fondundan 70 milyon dollardan artıq vəsait ayırmışdır. Bununla belə, beynəlxalq təşkilatların yardımına böyük ehtiyac var. Dövlətimizin başçısı Neft Fondunun fəaliyyəti barədə də məlumat verdi. BMT-nin Baş katibi Azərbaycanda yaradılmış Neft Fondunun fəaliyyətini yüksək qiymətləndirdi, eyni zamanda, neft hasil edən ölkələrin təcrübəsini öyrənməyin də zəruri olduğunu söylədi. Prezident İlham Əliyev bildirdi ki, ölkəmizdə Neft Fondu yaradılarkən Norveç modeli nümunə kimi götürülmüşdür. Azərbaycanın Neft Fondu şəffaf bir qurumdur və beynəlxalq maliyyə təşkilatları da onun fəaliyyətinə yüksək qiymət vermişlər. Cənab Kofi Annan söz verdi ki, Azərbaycanda qaçqınlara və məcburi köçkünlərə yardımların artırılması üçün donorlarla müvafiq iş aparacaqdır. Eyni zamanda, ümidvar olduğunu bildirdi ki, Dağlıq Qarabağ problemi tezliklə sülh yolu ilə həll ediləcəkdir. BMT-nin Baş katibi son dövrdə dünyada terror aktlarının artmasından narahatlığını ifadə etdi, Azərbaycanın antiterror koalisiyasında iştirakını yüksək qiymətləndirdi. Cənab Kofi Annan ölkəmizdə təsisatların yaradılması və təkmilləşdirilməsinin zəruriliyini vurğuladı və bildirdi ki, BMT bu yöndə Azərbaycana hər cür yardım göstərəcəkdir. Azərbaycanda yoxsulluğun azaldılması ilə bağlı dövlət proqramının qəbul edilməsindən məmnunluğunu söyləyən Baş katib bu sahədə də ölkəmizə köməyini əsirgəməyəcəyini bildirdi. Respublikamızda işsizliyin aradan qaldırılmasının, yoxsulluğun azaldılmasının dövlət başçısı kimi özünün ən əsas vəzifələrindən olduğunu vurğulayan Prezident İlham Əliyev BMT Baş katibini əmin etdi ki, ölkəmiz təsisatların yaradılması və təkmilləşdirilməsi sahəsində beynəlxalq birliklə əməkdaşlığı davam etdirəcəkdir. Daha sonra cənab Kofi Annan xalqımızın ümummilli lideri Heydər Əliyevin səhhəti ilə maraqlandı, özünün salamlarını və xoş arzularını ona çatdırmağı Prezident İlham Əliyevdən xahiş etdi. Səmimilik şəraitində keçən söhbət zamanı tərəfləri maraqlandıran bir sıra digər məsələlər barədə də ətraflı fikir mübadiləsi aparıldı.
Bölmənin digər xəbərləri
