AZƏRBAYCAN RESPUBLİKASININ TELEVİZİYA VƏ RADİO İŞÇİLƏRİNƏ!
Bu il Azərbaycanda milli radio verilişlərinin yayıma başlamasının 80, televiziya fəaliyyətinin 50 ili tamam olur.
Öz tarixini 1926-cı ildən başlayan Azərbaycan radio və televiziyası məhsuldar və şərəfli inkişaf yolu keçmişdir. Milli radio və televiziyamız fəaliyyət göstərdiyi bütün dövrlərdə Azərbaycan ədəbi dilinin yaranması və inkişafında, xalqımızın maariflənməsində, milli mədəniyyətimizin, ədəbiyyatımızın təbliğində, dünya azərbaycanlılarının birliyi və həmrəyliyi ideyalarının yayılmasında əvəzsiz rol oynamışdır. Bundan başqa, ölkədə gedən ictimai-siyasi, iqtisadi və mədəni quruculuq prosesləri, dövlət siyasətinin mahiyyətinin xalqa çatdırılması, cəmiyyətin aktual problemlərinin müzakirəsi, günün nəbzinə uyğun verilişlər hazırlanması da Azərbaycan televiziyası və radiosu üçün daim prioritet istiqamətlər olmuşdur.
Azərbaycan dövlət müstəqilliyini əldə etdikdən sonra radio və televiziya yeni ictimai-siyasi şəraitdə və hüquqi çərçivədə fəaliyyət göstərməyə başladı. Ölkəmizdə cərəyan edən taleyüklü proseslərin, həyata keçirilən sosial-iqtisadi layihələrin, siyasi, hüquqi islahatların təbliğində və informasiya dəstəyi ilə təmin olunmasında radio və televiziya mühüm rol oynamışdır.
Müasir dövrdə radio və televiziya hər evə, ailəyə daxil olmuş, insanların gündəlik həyatının ayrılmaz tərkib hissəsinə çevrilmişdir. Radio və televiziyanın texniki imkanları hədsiz dərəcədə genişlənmiş, qarşılıqlı əlaqə və kommunikasiyanın yeni formaları yaranmış, onun operativliyi və təsir dairəsi yüksəlmişdir. İctimai fikrə təsir imkanları baxımından televiziya və radio bütün digər kütləvi informasiya vasitələrindən yüksəkdə dayanır.
Ümummilli liderimiz Heydər Əliyev radio və televiziyanı daim diqqətdə saxlayır, onun cəmiyyət həyatında rolunu yüksək dəyərləndirirdi. İstər Azərbaycana rəhbərliyinin birinci dövründə, istərsə də müstəqil dövlətimizə başçılıq etdiyi illərdə Heydər Əliyev radio və televiziyanın inkişafına, onun maddi-texniki bazasının, yaradıcılıq imkanlarının genişlənməsinə xüsusi diqqət və qayğı göstərmiş, dövlət quruculuğunda, ölkəmizdə gedən ictimai-siyasi proseslərdə, azərbaycançılıq ideyalarının, milli-mənəvi dəyərlərin təbliğində onun əhəmiyyətini layiqincə qiymətləndirmişdir.
Hazırda Azərbaycan dövləti və cəmiyyəti keyfiyyətcə yeni inkişaf mərhələsini yaşamaqdadır. Ölkənin sosial-iqtisadi həyatının, regionların, qeyri-neft sektorunun, sahibkarlığın inkişafı, güclü nəqliyyat-enerji və sosial infrastrukturların yaradılması, dünya standartlarına cavab verən informasiya texnologiyalarının, təhsil, mədəniyyət, səhiyyə və idman şəbəkəsinin formalaşdırılması, milli mənəvi-əxlaqi dəyərlərin qorunması və zənginləşdirilməsi, torpaqlarımızın azad edilməsi və təcavüzkar erməni işğalının nəticələrinin aradan qaldırılması uğrunda mübarizə və s. kimi işlər Azərbaycanın dinamik inkişafından xəbər verir.
Əlbəttə, ölkədə gedən inkişaf prosesləri televiziya və radiolardan da yan keçməmişdir. Hazırda Azərbaycanın televiziya və radio məkanı getdikcə zənginləşir. Ölkəmizdə səhmdar cəmiyyətə çevrilmiş Azərbaycan Televiziya və Radio Verilişləri təşkilatından başqa, bir sıra ümumrespublika və regional özəl teleradio kanalları, İctimai Televiziya və Radio Yayımları Şirkəti mövcuddur. Bu qurumlarda yüzlərlə gənc və istedadlı teleradio jurnalisti, rejissorlar, başqa mütəxəssislər nəsli yetişmiş və müvəffəqiyyətlə fəaliyyət göstərir. Ölkəmizdə teleradio fəaliyyətinə dair qanunvericilik təkmilləşdirilir, onun hüquqi-normativ bazası qabaqcıl dünya və Avropa standartlarına uyğunlaşdırılır, müasir şəraitə və bazar iqtisadiyyatının tələblərinə cavab verən qaydalar, fəaliyyət normaları müəyyənləşdirilir.
Biz Azərbaycanın radio və televiziyalarından vətəndaşlarımıza və dünya ictimaiyyətinə ölkəmizdə baş verən taleyüklü hadisə və proseslər haqqında obyektiv və dolğun informasiya çatdırılmasını, onların peşəkarlıqla şərh edilməsini, insanlarımızın ümummilli vəzifələrin həllinə səfərbər edilməsini gözləyirik. Qloballaşma və beynəlxalq inteqrasiya proseslərinin geniş vüsət aldığı indiki dövrdə radio və televiziya həm də milli-mənəvi dəyərlərimizin qorunmasında, azərbaycançılığın bütün dünya azərbaycanlılarının birləşdirici və səfərbəredici dəyəri kimi təbliğ edilməsində, Azərbaycan dilinin, mədəniyyətinin, ölkəmizlə bağlı tarixi həqiqətlərin yayılmasında mühüm rol oynamalıdır.
Əmin olduğumu bildirirəm ki, azad rəqabət mühitinin hakim olduğu bazar iqtisadiyyatı, siyasi plüralizm və demokratiya şəraitində Azərbaycanın radio və televiziya təşkilatları da yeni dövrün tələblərinə uyğun fəaliyyət göstərərək, cəmiyyətin aktual problemlərinə diqqəti bir qədər də artıracaq, dinləyicilərin və tamaşaçıların informasiyaya artan tələbatını ödəyəcək, müxtəlif kateqoriyalardan olan insanların zövqünə və maraqlarına cavab verən cəlbedici proqramlar hazırlayacaqlar.
Əziz televiziya və radio işçiləri!
Sizi Azərbaycanda televiziya fəaliyyətinin 50 və radionun 80 illiyi münasibətilə ürəkdən təbrik edir, hər birinizə cansağlığı, uzun ömür, şəxsi həyatınızda və yaradıcılığınızda uğurlar arzulayıram.
İlham Əliyev
Azərbaycan Respublikasının Prezidenti
Bakı şəhəri, 4 noyabr 2006-cı il.
Bölmənin digər xəbərləri
