Azərbaycan və gürcü cəmiyyətlərinə tarixi şəxsiyyətlər bəxş etmiş orta məktəbdən REPORTAJ
Tbilisi, 17 may, AZƏRTAC
Bu gün Gürcüstanda 118 azərbaycandilli məktəb var. Onlardan yalnız ikisi Tbilisidədir. Tbilisidə yerləşən məktəblərdən biri M.F.Axundzadə adına 73 saylı tam orta məktəb sırf Azərbaycan dilli məktəbdir. Paytaxtdakı digər 164 saylı məktəbdə isə sadəcə Azərbaycan bölməsi fəaliyyət göstərir.
AZƏRTAC-ın Gürcüstan üzrə xüsusi müxbirinin 73 saylı tam orta məktəbdən hazırladığı xüsusi reportajı təqdim edirik.
Tbilisi şəhərinin mərkəzində azərbaycanlıların sıx yaşadığı qədim Meydan-Ortaçala məhəlləsində yerləşən bu təhsil ocağı Azərbaycan dilli məktəb olaraq 1953-cü ildən fəaliyyət göstərir. Amma bu məktəbin tarixi daha əvvələ - XIX əsrin sonların çıxır.
Məktəbin direktoru, iki dəfə Gürcüstanın “Şərəf” ordeni ilə təltif olunan, Əmək veteranı Salman Pirməmmədov deyib ki, burada şagirdlərin sayı artdıqca siniflərin sayı, müvafiq olaraq müəllimlərin sayı da artıb. Bu minvalla da 1932-ci ildə tam orta məktəb statusu alıb.
Sonradan - 1937-ci ildən görkəmli dramaturq M.F.Axundzadənin məktəblə yaxın əlaqəsi və yerli azərbaycanlıların istək və arzusu nəzərə alınaraq bu təhsil ocağına dahi mütəfəkkirin adı verilib.
Məktəbin qarşısında böyük ədibin büstü qoyulub. Çox vaxtı ədəbiyyat və Azərbaycan dili müəllimləri şagirdləri büstün önünə gətirir, onun və digər Azərbaycan ədiblərinin həyat və fəaliyyəti barədə açıq dərslər keçirirlər.
S.Pirməmmədov deyir ki, məktəb əvvəllər bərbad halda olub. Lakin, 2010-cu ildə 73 nömrəli orta məktəb Heydər Əliyev Fondunun “Təhsilə dəstək” layihəsi çərçivəsində əsaslı təmir edilib.
2010-cu ilin mayında əsaslı təmirinə başlanılan məktəbin binası elə həmin il sentyabrın 24-də istifadəyə verilib.
Hündürlüyü 20 metr olan binanın ümumi sahəsi 1719,3 kvadratmetrdir. Binadakı 22 otaqdan 12-si sinif otağı, 4-ü kabinet, qalanları isə kitabxana, kitab anbarı, müəllimlər otağı, direktor otağı, idman zalı, bufet, emalatxana, texniki vəsaitlərin və digər əşyaların qoyulması üçün anbardır. Ayrıca zirzəmisi və açıq süni idman meydançası var.
Məktəbin qarşısındakı park isə şagirdlərin tənəffüs fasiləsində istirahət yeridir.
Qeyd edək ki, məktəbə daxil olarkən ilk növbədə təmizlik və yüksək nizam-intizam, divarlardakı məlumat lövhələri diqqəti çəkir. Burada Azərbaycanın Birinci vitse-prezidenti Mehriban Əliyevanın şagirdlərlə birgə çəkdirdiyi fotolardan və məktəbin Heydər Əliyev Fondu tərəfindən əsaslı təmirdən sonrakı fotolardan ibarət stendlər var. Eyni zamanda, divarlarda şagirdlərinin əl işlərindən ibarət rəsmlər, tarixi sərkərdələr Nadir şah Əfşar, Əmir Teymur barədə məlumat lövhələri də diqqəti çəkir.
S.Pirməmmədov deyir ki, bu məktəb Azərbaycan və Gürcüstan elm, mədəniyyət, incəsənət ictimaiyyətinə tarixi şəxsiyyətlər bəxş edib. Onlardan akademik Zahid Xəlilov, elm fədailəri Orxan Əfəndiyev, İsmayıl Hüseynov, iki dəfə Sosialist Əməyi Qəhrəmanı Akif Cəfərov, Dilarə Əliyeva, Gürcüstanın Xalq artisti İbrahim İsfahanlı, Azərbaycanın Xalq artisti Mövsüm Sənani, Mustafa Mərdanov, Əli Qurbanov, Ələkbər Quliyev, aktrisa Nailə Allahverdiyeva və başqalarını misal göstərmək olar.
Direktorun sözlərinə görə, məktəb Gürcüstan və Azərbaycan dövlətləri tərəfindən tam, hərtərəfli qayğı ilə əhatə olunub. Hər il Azərbaycan Respublikasının Elm və Təhsil Nazirliyi tərəfindən Azərbaycan dili və ədəbiyyatı dərslikləri məktəbə təqdim olunur. Gürcüstan Təhsil və Elm Nazirliyi də məktəbi hər il lazım olan dərs və texniki vəsaitlə təmin edir. Elə bunun nəticəsidir ki, məktəb bu gün də təhsildə uğurlarını davam etdirir.
Direktor deyir ki, 2023-cü ildə məktəbin məzunu olmuş 17 şagirdin, 2024-cü ildə məzun olmuş 19 şagirdin hamısı, 2025-ci ildə isə 24 məzundan 23-ü tələbə adını qazanıb.
Gürcüstan ali məktəblərini uğurla bitirən tələbələrin bəziləri hazırda Azərbaycanda və Gürcüstanda dövlət, hökumət və bələdiyyə qurumlarında çalışır, bəziləri xarici ölkələrdə fəaliyyət göstərirlər. Məktəbə qayıdıb pedaqoji fəaliyyətlə məşğul olanlar da var.
S.Pirməmmədov bildirib ki, şagirdlərin belə yüksək göstəricilərinin əsas səbəbi müəllimlərin işə məsuliyyətlə yanaşmaları, şagirdlərə Azərbaycan dili ilə yanaşı dövlət dilini də mükəmməl öyrətmələridir.
Məktəbdə gürcü dili bölməsi də yaradılıb və burada şagirdlər dövlət dilini mükəmməl öyrənirlər.
Bölmənin digər xəbərləri
