AZƏRBAYCAN VƏ TÜRKİYƏ PREZİDENTLƏRİNİN GENİŞ TƏRKİBDƏ GÖRÜŞÜ
AZƏRTAC xəbər verir ki, aprelin 4-də Prezident sarayında, təkbətək görüşdən sonra Azərbaycan Prezidenti İlham Əliyevin və Türkiyə Prezidenti Əhməd Necdət Sezərin nümayəndə heyətlərinin iştirakı ilə geniş tərkibdə görüşü keçirilmişdir.
Prezident İlham Əliyev Türkiyə Prezidenti Əhməd Necdət Sezəri və səfərdə onu müşayiət edən nümayəndə heyətinin üzvlərini bir daha salamlayaraq, bu səfərə çox böyük əhəmiyyət verdiyini, iki qardaş ölkənin həmişə birlikdə olduğunu vurğuladı. Dövlətimizin başçısı dedi ki, bizim birliyimiz həm ölkələrimiz üçün, həm də bölgə üçün önəmli amildir. Bizi birləşdirən tarixi əlaqələr, mədəni əlaqələr indiki zəmanədə çox mühüm rol oynayır. Eyni zamanda, siyası əlaqələrimiz də çox yüksək səviyyədədir. Türkiyə ilə Azərbaycanın əlaqələri dünya üçün ən önəmli sahələrdən biri olan enerji sektorunu da əhatə edir. Bu sahədəki irimiqyaslı layihələr bizi daha da sıx birləşdirir. Mən əminəm ki, Sizin səfəriniz və buradakı görüşləriniz bizim birliyimizi daha da gücləndirəcək, Türkiyə-Azərbaycan, iki qardaş ölkə bir-biri ilə daha da sıx bağlı olacaqdır.
Bildiyiniz kimi, bizim aramızda çox fəal siyasi dialoq aparılır. Bütün məsələlər fəal şəkildə müzakirə olunur, ticarət əlaqələrimiz də inkişaf edir. Bütün sahələrdə olduğu kimi, mədəni, humanitar sahələrdə də çox böyük nailiyyətlər, birgə proqramlar var və onlar uğurla icra edilir. Mən əminəm ki, bu səfər də ikitərəfli əlaqələrin inkişafında mühüm rol oynayacaq və çox uğurlu olacaqdır.
Türkiyə Prezidenti Əhməd Necdət Sezər ona və nümayəndə heyətinə göstərilən qonaqpərvərliyə görə Azərbaycan Prezidentinə və xalqına dərin təşəkkürünü bildirdi, qardaş ölkəyə beşinci dəfə gəlməsindən və burada keçirilən görüşlərdən məmnunluğunu söylədi. O, xalqlarımız arasında tarixi və mədəni əlaqələrin sağlam təməllər üzərində qurulduğunu vurğulayaraq dedi ki, Türkiyə ilə Azərbaycan arasında heç bir siyasi problem olmamışdır. Bütün sahələrdə, o cümlədən enerji sektorunda işbirliyimiz davam edir. Ticarət əlaqələri çox uğurla inkişaf etməkdədir. 2004-cü ildə 550 milyon dollar həcmində olan ticarət dövriyyəsi 2005-ci ildə 795 milyon dollara çatmışdır və bu il 1 milyard dolları keçəcəkdir. Düşünürük ki, bunun daha da artırılması üçün yetərincə imkanlarımız vardır.
Prezident Əhməd Necdət Sezər Türkiyənin iş adamlarının Azərbaycana marağının böyük olduğunu vurğulayaraq dedi ki, onların Azərbaycana qoyduqları sərmayə 2,2 milyard dollara çatmışdır və inanırıq ki, bu, gələcək illərdə daha da artacaqdır. Qarşıdakı illərdə enerji sektorunda, xüsusilə neft sahəsində “Türk Petrolları” şirkəti tərəfindən görüləcək işlərin həcmi 4,5 milyard dollar həcmində olacaqdır.
Görüşdə Ermənistan-Azərbaycan, Dağlıq Qarabağ münaqişəsinin sülh yolu ilə həlli, regional və beynəlxalq layihələr barədə də söhbət getdi.
Bölmənin digər xəbərləri
