AZƏRBAYCANDA YENİ PİVƏ ZAVODU İNŞA OLUNUR
AZƏRTAC xəbər verir ki, «Unileasing» şirkəti Xaçmazda pivə zavodunun inşası üçün avadanlıq alınmasının maliyyələşdirilməsi layihəsinin icrasına başlamışdır.
Pivə zavodunun cari ilin sonunda istismara verilməsi planlaşdırılır. Layihənin dəyəri 2,7 milyon ABŞ dolları, şirkətin sərmayəsi isə 1,5 milyon dollar təşkil edir.
Avadanlıq Avropa standartlarına uyğundur və keyfiyyətli pivə istehsal etməyə imkan verəcəkdir. Çex texnologiyasına əsaslanan bu avadanlıq vasitəsilə məhsul istehsalında yerli və xarici xammaldan istifadə olunacaqdır.
Pivə zavodu üçün avadanlığın alınmasının maliyyələşdirilməsi «Sənaye avadanlığının lizinqi» proqramı çərçivəsində həyata keçirilir. Bu proqram çərçivəsində artıq mayın 1-dək 4 milyon dollar dəyərində 22 layihə maliyyələşdirilmişdir.
Hazırda «Unileasing» şirkəti ABŞ və Türkiyə «Eximbank»ları ilə yerli sahibkarların müxtəlif layihələrinin maliyyələşdirilməsinə vəsait cəlb edilməsinə dair danışıqlar aparır.
Bölmənin digər xəbərləri
