İQTİSADİYYAT
Azərbaycandan keçməklə Türkiyədən Çinə yeni növ yüklərin daşınmasına başlanılıb
Bakı, 29 yanvar, AZƏRTAC
“Azərbaycan Dəmir Yolları” QSC-nin törəmə şirkəti olan “ADY Konteyner” MMC marşrutların şaxələndirilməsi və ölkəmizin tranzit imkanlarının artırılması istiqamətində tədbirləri davam etdirir. Türkiyənin Ankara şəhərindən Çinin Sian şəhərinə hərəkət edən qatar “ADY Konteyner” MMC-nin Türkiyədəki, Gürcüstandakı və Qazaxıstandakı tərəfdaşları ilə birgə təqdim etdiyi yeni logistik məhsuldur.
MMC-dən AZƏRTAC-a bildirilib ki, qatar hər biri 40 fut olan, 42 konteynerdən ibarətdir. Yükü sənayedə istifadə olunan qeyri-üzvi birləşmələr olan Türkiyənin növbəti ixrac qatarı Bakı-Tbilisi-Qars dəmir yolu ilə hərəkət edərək Bakı Limanına çatdıqdan sonra fider gəmisi vasitəsilə Qazaxıstanın Aktau limanına yola salınacaq.
Qatarın operatorları Transxəzər Beynəlxalq Nəqliyyat Konsorsiumunun üzvləri - “ADY Konteyner” (Azərbaycan), “KTZ Express” (Qazaxıstan), “GR Logistics” (Gürcüstan) və “Pasifik Eurasia Logistics” (Türkiyə) şirkətləridir.
Qatar ümumilikdə 7792 kilometr yol gedəcək.