AZƏRTAC-ın xüsusi müxbiri xəbər verir ki, mayın 7-də ABŞ-ın Virciniya ştatında Azərbaycan xalqının ümumilli lideri, dünya şöhrətli siyasi xadim Heydər Əliyevin 85 illik yubileyi təntənəli şəkildə qeyd olunmuşdur. “Müasir Azərbaycanın qurulması: ümummilli lider Heydər Əliyevin irsi” mövzusunda keçirilən tədbirdə Birləşmiş Ştatların görkəmli ictimai-siyasi xadimləri, konqresmenlər və hakimiyyət qurumlarının nümayəndələri, Vaşinqtondakı diplomatik korpusun, yerli medianın, Azərbaycan icmasının təmsilçiləri iştirak edirdilər. “Amerika xalqının atası” hesab edilən ABŞ-ın ilk Prezidenti Corc Vaşinqtonun Maunt Vernon tarixi malikanəsində “Azərbaycanın Corc Vaşinqtonu” kimi tanınan Prezident Heydər Əliyevin yubileyinin keçirilməsi hamı üçün böyük rəmzi məna daşıyırdı.

Heydər Əliyevin həyat və fəaliyyətini əks etdirən fotosərgi ilə tanışlıqla başlayan tədbir “Lider” televiziyasının istehsalı olan “Azərbaycana xoş gəlmisiniz” sənədli filminin nümayişi ilə davam etmişdir.

Daha sonra yubileylə bağlı Azərbaycanın ABŞ-dakı səfirliyi tərəfindən ziyafət verilmişdir. Qonaqları salamlayan ölkəmizin Vaşinqtondakı səfiri Yaşar Əliyev çıxışında demişdir ki, ümummilli lider bütün ömrünü xalqına və ölkəsinə xidmətə həsr etmişdir. Müasir Azərbaycanın kiçik sabiq sovet respublikasından müstəqil və qüdrətli demokrtaik dövlətə çevrilməsində Heydər Əliyevin rolu əvəzsizdir. Onun siyasi uzaqgörənliyi, gərgin səyləri və müdrikliyi nəticəsində Azərbaycanda sabitlik bərqərar edilmiş, on minlərlə insanın həyatına son qoyan Ermənistan-Azərbaycan, Dağlıq Qarabağ münaqişəsində atəşkəsə nail olunmuş, Xəzər hövzəsinin enerji ehtiyatlarını dünya bazarlarına çıxarmaqla qlobal enerji təhlükəsizliyinə töhfə verən Bakı-Tbilisi-Ceyhan əsas ixrac boru kəməri çəkilmişdir. Bunlar Heydər Əliyevin tarixi xidmətlərinin yalnız bir neçəsidir.

Sonra ümummilli liderin nəvəsi, Heydər Əliyev Fondunun Rusiya Federasiyasındakı nümayəndəliyinin rəhbəri Leyla Əliyeva çıxış etmişdir. O, yubiley mərasiminə toplaşan qonaqlara minnətdarlığını bildirərək demişdir: “Mən həyatımın əhəmiyyətli bir hissəsini babamla keçirdiyimdən xoşbəxtlik və fərəh hissi duyuram. Sizlərdən çoxları onu böyük siyasi nailiyyətlərinə və irsinə görə tanıyırsınız. Mən isə burada mənə yaxın və əziz olan bir şəxs haqqında danışmaq istərdim. Babam həftənin yeddi gününü saatlarla işləsə də, ailəsinə həmişə vaxt ayırardı. İndi mən həmin vaxtları çox yüksək dəyərləndirirəm. Uşaqlıq dövrümdən başlayaraq o, mənim dostum olmuşdur. Bilirdim ki, nə çətinliyim olsa, babamın dəstəyinə və məsləhətinə güvənə bilərəm. O, yaşından asılı olmayaraq, ailədə kiminlə necə danışmağı gözəl bilirdi. Bizə həmişə qayğıkeş və rəhmdil olmağı öyrədərdi.

Hazırda mən Moskva Dövlət Beynəlxalq Münasibətlər İnstitutunda oxuduğuma görə, onun nailiyyətlərini peşəkar baxımdan da qiymətləndirə bilirəm. Heydər Əliyev iki dəfə Azərbaycana başçılıq etmişdir, həyatının sonuna qədər hakimiyyətdə idi. O, vətəndaş müharibəsinin qarşısını almış, iqtisadiyyatı dirçəltmiş, senzuranı və ölüm hökmünü ləğv etmişdir. Onun səyləri nəticəsində Azərbaycan müstəqil inkişaf yoluna çıxmışdır. Bu gün bizim ölkəmiz iqtisadi artım baxımından dünyada liderdir, yoxsulluğun səviyyəsi isə MDB ölkələri arasında ən aşağıdır. Bunların hamısı cəmi 14 il ərzində əldə edilmişdir. Heydər Əliyev ABŞ-la dostluq münasibətlərinin inkişafına böyük əhəmiyyət verirdi. ABŞ-a səfərlərinin birində, Hyustonda olarkən ona mənim qardaşım, kiçik Heydər Əliyevin dünyaya gəlməsi haqda xoş xəbər vermişdilər. Amerika rəsmiləri bizim ailəmizə ilk təbrik göndərənlərdən idilər. Bəlkə də, həmin məqamda onunla birlikdə olan adamların bəziləri bu gün burada iştirak edirlər.

İndi Heydər Əliyev bizimlə deyil. Lakin onun xeyirxah əməlləri böyük uğurla Heydər Əliyev Fondu tərəfindən davam etdirilir. 2004-cü ilin mayın 10-da fəaliyyətə başlayan bu Fond kimsəsizlərin, qaçqın-köçkünlərin, əlillərin və köməyə ehtiyacı olan digər insanların qayğısına qalır, məktəblər, xəstəxanalar və mədəniyyət mərkəzlərinin tikilməsində iştirak edir. Mən bu Fondun fəaliyyətində iştirak etməkdən və babamın başladığı işləri davam etdirməkdən qürur duyuram. O, bizə həmişə başqa insanların qayğısına qalmağı öyrədərdi. Məncə, bu gün tək ailəsi deyil, bütün Azərbaycan xalqı onun üçün darıxır. Lakin onun həmişə bizimlə olduğuna inam hamımıza təsəlli verir.”

Daha sonra ABŞ Konqresinin sabiq üzvü Qreq Laflin, “Azərbaycan İntərnəşnl” jurnalının baş redaktoru Betti Bleyer, ABŞ-Azərbaycan Ticarət Palatasının sədri Ceyms Beyker görkəmli tarixi şəxsiyyət haqqında xatirələrini bölüşmüşlər.

AZƏRTAC-ın xüsusi müxbiri yubiley tədbirində iştirak edən qonaqların bir neçəsindən ümummilli lider Heydər Əliyev və müasir Azərbaycan dövlətinin yaranmasında onun roluna dair firkilərini bölüşməyi xahiş etmişdir:

Nüfuzlu “Ceymstaun” Fondunun prezidenti QLEN HOVARD: “Bu gün Corc

Vaşinqtonun tarixi malikanəsi olan Maunt Vernona toplaşmağımız yerinə düşür. Mən, Azərbaycan və Prezident Heydər Əliyev haqda düşünərkən onu məhz Azərbaycanın Corc Vaşinqtonu hesab edirəm. O, doğrudan da, uzaqgörən şəxsiyyət kimi, Azərbaycanı sabitliyə və inkişafa doğru apardı. Burada iştirak etməyimdən çox məmnunam”.

ABŞ Prezidentinin milli təhlükəsizlik üzrə sabiq müşaviri ZBİQNEV BJEZİNSKİ: “Məncə, Heydər Əliyevin irsi başlıca olaraq, Azərbaycanın müstəqilliyinin möhkəmlənməsindən ibarətdir. Bu da, öz növbəsində, ABŞ-la strateji münasibətlərin inkişafı ilə bağlı idi. Bunun mexanizmi isə, əlbəttə, Bakı-Tbilisi-Ceyhan kəməri olmuşdur. Mən bu kəmərin yaradılması təşəbbüsündə və Prezident Heydər Əliyevlə danışıqlarda iştirak edirdim. Bu layihənin yaranması səbəbləri qismən iqtisadi olsa da, əsasən, strateji idi. Layihə Azərbaycanın dünyaya çıxışını təmin etdi və dünyaya da imkan verdi ki, Xəzər dənizi bölgəsi və Mərkəzi Asiyada yaxından dinc yolla iştirak etsinlər. Zaman ötdükcə, hər şey dəyişir. Lakin Heydər Əliyevin müstəqillik irsi əbədidir. Məncə, bu gün əksər azərbaycanlılar hesab edirlər ki, yaşayış şəraiti, perpsketivlər daha yaxşıdır. Ən əhəmiyyətlisi isə, onların öz müstəqil dövləti vardır”.

ABŞ Konqresinin sabiq üzvü ROBERT LİVİNQSTON: “Heydər Əliyev Azərbaycanı dəyişdirən, Azərbaycanı həqiqi mənada yeni dünyaya aparan şəxsiyyət olmuşdur. O, Azərbaycanı irəli aparmaq üçün kifayət qədər uzaqgörənlik, dözüm, qabiliyyət və liderliyə malik idi. Azərbaycan müstəqil olandan sonra dünyaya yol tapmalıydı. Heydər Əliyev məhz bunu etdi. Sovet dövründə Azərbaycan xalqı öz sərvətlərinə sahib çıxa bilmirdi. Heydər Əliyev isə uzaqgörənliklə bu sərvətləri Azərbaycanın gələcəyinin qurulmasına yönəltdi. Onun siyasəti hazırda ölkənizə böyük dividendlər gətirir. Hazırda Heydər Əliyevin oğlu onun yolunu davam etdirir. Prezident Əliyev və xanımı ölkəsinin layiqli təmsilçiləridir. İndi Azərbaycan beynəlxalq birlikdə təkcə zəngin ehtiyatlara malik ölkə kimi deyil, həm də çox mühüm strateji mövqeyi olan bölgədə əsas tərəfdaş dövlət kimi tanınır”.

“Amoko” şirkətinin sabiq prezidenti DON STEYSİ: “Heydər Əliyev nüfuzlu şəxsiyyət idi. Xatırlayıram, ilk dəfə görüşəndə biz gündüz saat 3-dən gecə saat 1-ə qədər söhbət etdik. Mən yorulmuşdum. Amma o, yorulmurdu, enerji ilə dolu idi. “Əsrin müqaviləsi”nin imzalanması üçün Prezident Əliyev çox işlər görmüşdür. Azərbaycanda bir sıra hakimiyyət dəyişikliklərinin şahidi olduqdan sonra biz Heydər Əliyev hakimiyyətə gələndə ondan müqavilənin imzalanması üçün dəstək istədik. Onun dəstəyi və iştirakı nəticəsində bu, mümkun oldu. Heydər Əliyev çox mürəkkəb şəraitdə nəzarəti ələ alaraq, ölkədə sabitlik yaratdı. Yadımdadır, müqavilələr imzalanarkən hamıdan ədalətli olmağı istəyirdi. Şirkətləri Azərbaycana qarşı ədalətli olmağa və öz adamlarını da şirkətlərə qarşı ədalətli olmağa çağırırdı. Mən 1997-ci ilin yanvarında Heydər Əliyevin Prezident Klintonla görüşünü təşkil edənlərdən biri idim. Xatırlayıram ki, Prezident Klinton onunla mümkün qədər tez görüşmək istəyirdi. Klinton hakimiyyəti Heydər Əliyev barədə yüksək fikirdə idi”.

Corctaun Universitetinin professoru SÖHRAB SÖBHANİ: “İlk dəfə Heydər Əliyevlə Naxçıvanda, daha sonra Bakıda, parlamentin sədri olarkən görüşmüşdüm. Məncə, o, tarixi İnsan idi. İnsan sözünü xüsusi vurğulamaq istərdim. Onun Azərbaycan üçün ürəkdən yandığını, Azərbaycan xalqının inkişafını ürəkdən istədiyini həmişə hiss edirdim. Kabinetinə girəndə həmişə ayağa qalxar, qucaqlayar, ailə-uşaqları soruşardı. Bu, onun yüksək insani cəhətlərini nümayiş etdirirdi. Dünya şöhrətli lider, Azərbaycanın dövlət başçısı olmaqla yanaşı, o, həm də ata və baba idi. Mən Heydər Əliyevi daim belə xatırlayacağam: səmimi insan, qayğıkeş baba kimi”.

######