AZƏRBAYCANIN İRANDAKI SƏFİRLİYİNDƏ GÖRÜŞ
AZƏRTAC-ın xüsusi müxbiri xəbər verir ki, İqtisadi Əməkdaşlıq Təşkilatının (İƏT) baş katibi Xurşid Ənvər Azərbaycanın İrandakı səfirliyində olmuş, burada səfir Abbasəli Həsənovla görüşmüşdür.
Görüşdə İƏT-in 2006-ci il mayın 4-5-də Bakıda keçirilmiş zirvə toplantısında qəbul olunmuş qərarların icra vəziyyətinə dair fikir mübadiləsi aparılmış, növbəti sammitlə bağlı məsələlər müzakirə edilmişdir.
Azərbaycanın İƏT-in ən fəal üzvülərindən biri olduğunu diqqətə çatdıran baş katib, təşkilatın elm fondunun yaradılmasının vacibliyini qeyd etmişdir.
Səfir Abbasəli Həsənov demişdir ki, həqiqətən də İƏT-ə üzv olan dövlətlər böyük elmi potensiala malikdirlər. Bu potensialdan səmərəli istifadə etmək üçün bütün imkanlar səfərbər olunmalıdır. Təcrübə göstərir ki, intellektual potensialdan istifadə edən ölkələr daha sürətlə inkişaf edirlər. Milliyyətcə azərbaycanlı olan görkəmli alim Lütfi Zadənin elmi ixtiraları dünya iqtisadiyyatına böyük töhfələr vermişdir. Zəngin intellektə malik alimlərimiz çoxdur və dövlətimiz onların biliklərindən səmərəli istifadə etmək üçün hər cür şərait yaratmışdır.
Bölmənin digər xəbərləri
