AZƏRBAYCANIN MÜDAFİƏ NAZİRİ PAKİSTANIN ÖLKƏMİZƏ YENİ TƏYİN OLUNMUŞ SƏFİRİ İLƏ GÖRÜŞMÜŞDÜR
Müdafiə Nazirliyinin mətbuat xidmətindən AZƏRTAC-a bildirmişlər ki, nazir, general-polkovnik Səfər Əbiyev avqustun 4-də Pakistan İslam Respublikasının ölkəmizə yeni təyin olunmuş səfiri Əbdul Həmid ilə görüşmüşdür.
Qonağı təyinatı münasibətilə təbrik edən Səfər Əbiyev Azərbaycan ilə Pakistan arasında bütün sahələrdə yaranmış dostluq və qardaşlıq münasibətlərindən, əməkdaşlığın perspektivlərindən danışmışdır.
Müdafiə naziri görüşdə regionda mövcud olan mürəkkəb vəziyyətə, Dağlıq Qarabağ münaqişəsinin sülh yolu ilə həllini ləngidən məsələlərə toxunmuşdur.
Nazir bildirmişdir ki, problemin dinc yolla həll edilməyəcəyi təqdirdə Azərbaycan öz torpaqlarını işğaldan azad etməyin başqa vasitələrini seçə bilər. Biz heç zaman Ermənistanın təcavüzkar siyasətini davam etdirməsinə imkan verməyəcəyik.
Səfir Əbdul Həmid Azərbaycanın dövlət müstəqilliyini ilk tanıyan ölkələr sırasında Pakistan İslam Respublikasının olduğunu qeyd etmiş və Dağlıq Qarabağın Azərbaycanın ayrılmaz hissəsi olduğunu vurğulamışdır.
Bölmənin digər xəbərləri
