Azərbaycanın rəqs qrupu “Ukrayna xalq kollektivi ansamblı” adına layiq görülüb
Kiyev, 2 may, AZƏRTAC
Azərbaycan mədəniyyətini Ukraynada fəal təbliğ edən “Qafqaz” ansamblı “Ukrayna xalq kollektivi ansamblı” adına layiq görülüb.
AZƏRTAC xəbər verir ki, bu ad ansambla Ukrayna Mədəniyyət Nazirliyi tərəfindən verilib. Ansamblın yaradıcısı və rəhbəri Nicat Mirzəyev deyib ki, kollektivin bu ada layiq görülməsi Azərbaycan mədəniyyətinin növbəti uğurlarından biridir: “İşimizə sevginin, gecə-gündüz çalışmağımızın bəhrəsini gördük. Ukraynanın xoreoqrafiya tarixində bir iz qoyduq. Bununla da “Qafqaz” ansamblı Ukraynada həmişəlik brendə çevrildi”.
Qeyd edək ki, Nicat Mirzəyev 23 ildən çoxdur Ukraynada yaşayır. O, Qafqaz rəqsləri məktəbində və həmçinin “Qafqaz” ansamblının fəaliyyəti çərçivəsində Azərbaycanın milli rəqslərini ukraynalılara və bu ölkədə yaşayan başqa xalqların nümayəndələrinə tədris edir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
