AZƏRBAYCANIN STOLÜSTÜ TENNİSÇİLƏRİ AVROPA ÇEMPİONATINDA BÜRÜNC MEDAL QAZANMIŞLAR
Azərbaycanın stolüstü tennis üzrə qadınlardan ibarət yığma komandası Sankt-Peterburqda başa çatmış Avropa çempionatının üçüncü divizyonunda bürünc medala sahib olmuşdur.
Bu barədə AZƏRTAC-a Azərbaycan Stolüstü Tennis Federasiyasından məlumat vermişlər.
Federasiyadan bildirmişlər ki, baş məşqçi Aleksandr Zudovun rəhbərliyi ilə Billurə Eminova, Səbinə Əhmədova və Rüfət Quliyevadan ibarət Azərbaycan yığması qrupda Kosovo (3:0), Uels (3:2) və Finlandiya (1:3) yığmalarını üstələyərək yalnız Moldova (0:3) və Latviya (3:1) tennisçilərinə uduzmuşdur. Moldova və Latviya yığma komandaları isə turnirin müvafiq olaraq qızıl və gümüş medallarını qazanmışlar.
Əzmkar oyunu ilə yadda qalan Azərbaycan yığması bu nəticə ilə Moldova və Latviya milliləri ilə birgə ikinci divizyonda yarışmaq hüququ qazanmışdır.
Artıq gələn il Almaniyanın Ştutqart şəhərində keçiriləcək növbəti Avropa çempionatında mübarizəyə ikinci divizyondan başlayacaq Azərbaycan yığmasının rəqibləri daha ciddi komandalar olacaqlar. Baş məşqçi Aleksandr Zudov demişdir ki, son illər Azərbaycanın qadın tennisçilərinin oyununda inkişaf nəzərə çarpır. Yığmamız öz oyunu ilə Qafqaz regionunda ən güclü komandalardan birinə çevrilmişdir.
Qeyd edək ki, ikinci divizyonda yarışmaq hüququnu 56 milli assosiasiyasının təmsil olunduğu Avropa Stolüstü Tennis İttifaqının reytinqində 17-32-ci pillələrdə qərarlaşmış komandalar qazanırlar.
Bölmənin digər xəbərləri
