İQTİSADİYYAT
AZƏRBAYCANIN SU ELEKTRİK STANSİYALARININ ÜMUMİ GÜCÜ ARTMIŞDIR
Aramsız yağan yağışlar nəticəsində Mingəçevir dəryaçasında suyun səviyyəsi yüksəlmişdir. Bu da öz növbəsində elektrik enerjisi istehsalının artmasına imkan verir.
“Azərenerji” ASC-dən AZƏRTAC-a bildirmişlər ki, yağıntılar nəticəsində anbarda suyun səviyyəsi 77,65 metrə çatmışdır. Bunun keçən ilin maksimal göstəricisi ilə müqayisədə 60 santimetr aşağı olmasına baxmayaraq, stansiyanın işini müsbət qiymətləndirmək olar. Hazırda Mingəçevir SES-in altı hidroaqreqatından beşi işləyir. Üç nömrəli enerji blokunda isə bərpa işləri aparılır və onu gələn il istismara buraxmaq nəzərdə tutulur.
Qış mövsümü ərəfəsində aparılan təmir işləri nəticəsində Mingəçevir və Şəmkir SES-lərində, enerji istehsalının həcmi 810 MVt-a qədər artmışdır.