Azərbaycanın sülhə və əməkdaşlığa əsaslanmış enerji siyasəti ŞƏRH
Bakı, 5 mart, AZƏRTAC
1990-cı illərin əvvəlində müstəqilliyinə qovuşmuş Azərbaycan bütün dünya dövlətləri tərəfindən tanındıqdan sonra, Azərbaycan xalqına aid olan təbii sərvətlərin düzgün idarə olunmasını və bölgüsünü şəffaf apararaq, dövlət maraqlarını təmin etməklə hər bir iddialı tərəfin maraqlarının qorunmasına çalışıb. Müstəqilliyinin ilk dövründə Azərbaycan demokratik üsul idarəçiliyinin və dövlətçilik ənənələrinin multikultural dəyərlər əsasında formalaşdırılması siyasətini həyata keçirdi.
Bunu AZƏRTAC-a açıqlamasında Milli Məclisin deputatı Məzahir Əfəndiyev söyləyib.
O qeyd edib ki, 1994-cü ildə Ulu Öndər Heydər Əliyevin rəhbərliyi və yorulmaz fəaliyyəti nəticəsində imzalanmış Əsrin müqaviləsi o zaman dünyanın və regionun gələcək inkişafında bütün tərəflərin maraqlarını təmin etməklə bu günə qədər öz dayanıqlılığını qoruyub saxlayıb. Əsrin müqaviləsinin icrası, eyni zamanda, Azərbaycan dövlətinin dünyada tanınmasına, nüfuzunun artmasına gətirib çıxarmış, eləcə də etibarlı tərəfdaşa çevirmişdir. Məhz müstəqilliyimizin əsaslarından biri olan neft müqaviləsi iqtisadiyyatımızın inkişafına, İkinci Qarabağ - Vətən müharibəsində Zəfərimizin əldə olunmasında mühüm maliyyə mənbəyinə çevrildi.
“Prezident İlham Əliyev Azərbaycanın çoxvektorlu xarici siyasətində enerji siyasətini prioritet elan edərək, onu Azərbaycanın bütövlüyünün, regionda sabitliyin, təhlükəsiz, davamlı inkişafın təmin olunmasında əsas alət kimi istifadə etməkdədir. Ölkəmizin son 20 ildə Qərb-Şərq, Şimal-Cənub birləşdirici logistik dəhlizlər üzrə çoxsaylı vacib layihələri həyata keçirməsi, eləcə də dünya siyasi arxitekturasının dəyişdiyi bir dönəmdə yeni çağırışlara əsaslanan enerji siyasətinə olan sadiqliyi Avropa İttifaqının, eləcə də Avropa İttifaqına üzv dövlətlərin Azərbaycana olan marağını artırmaqdadır”, - deyə deputat bildirib.
Onun sözlərinə görə, bu gün Azərbaycan neft müqavilələrinin uğurlu idarə edilməsi ilə yanaşı, qaz hasilatının həcmini artırmağa ildən-ilə müvəffəq olmaqdadır. Eyni zamanda, dördüncü sənaye inqilabının çağırışlarından olan alternativ enerji mənblərinin müəyyən edilməsi, yaşıl gündəliyin zənginləşdirilməsi Azərbaycanın enerji siyasətinin tərkib hissəsi kimi, gələcək layihələrin hazırlanması və həyata keçirilməsində mühüm rol oynayır.
Son illərdə Azərbaycanın təbii enerjinin dünya dövlətlərinə çatdırılması istiqamətində mühüm nailiyyətlərə imza atdığını diqqətə çatdıran M.Əfəndiyev deyib: “20-dən çox ölkəni, 40-dan çox beynəlxalq şirkəti əhatə edən, 3500 kilometrdən artıq uzanan TAP və TANAP qaz kəmərlərinin şaxələndirilməsi işinə töhfə verən Azərbaycan bu gün istehsal etdiyi qazı Avropa bazarına çatdırmağa nail olub. Etibarlı tərəfdaş olduğunu artıq bütün dünyaya sübut etmiş Azərbaycan Cənub Qaz Dəhlizi layihəsində iştirakı ilə bu gün yeni uğur hekayəsi yazır. Martın 1-də Bakı şəhərində Cənub Qaz Dəhlizi Məşvərət Şurası çərçivəsində nazirlərin 10-cu və Yaşıl Enerji Məşvərət Şurası çərçivəsində nazirlərin 2-ci iclasında Prezident İlham Əliyevin çıxışı zamanı qeyd etdiyi kimi, “Bizim sözümüz imzamız qədər dəyərlidir. Əminəm ki, qarşımıza qoyduğumuz bütün planlar həyata keçiriləcəkdir”.
Cənub Qaz Dəhlizi Məşvərət Şurasının yubiley iclası ilə yanaşı, Yaşıl Enerji Məşvərət Şurası nazirlərinin 2-ci iclasının da keçirilməsi ölkəmizin alternativ enerji mənbələrinin inkişaf etdirilməsinə, eləcə də dünyada ekoloji problemlərin həllinə göstərdiyi pozitiv siyasətdir. Eyni zamanda Azərbaycan öz təbii neft-qaz yataqlarından başqa, bağlanmış müqavilələr əsasında qısa müddətdə küləkdən, günəşdən əldə olunan alternativ enerjinin istismarına başlayacaq. Bu da Paris İqlim Sazişində nəzərdə tutulduğu kimi, təbii ehtiyatların mühafizəsi, iqtisadiyyatın dekarbonizasiyası, ümumilikdə ətraf mühitin çirklənməsinin qarşısının alınması üçün əlavə yeni imkanlar yaradacaq”.
Deputat qeyd edib ki, artıq üç ildir fəaliyyət göstərən Cənub Qaz Dəhlizi layihəsi Avrasiyanın ən böyük infrastruktur layihələrindən biri olmaqla yanaşı, eyni zamanda, kəmər üzərində yerləşən dövlətlərin xalqlarının iqtisadi, mədəni, siyasi əlaqələrinin genişlənməsinə və dünyada sülhün dayanıqlılığına öz töhfəsini verir.
Təsadüfi deyil ki, Azərbaycan bütün dünya dövlətlərinin yekdil qərarı ilə bu il COP29-a ev sahibliyi edəcək. Bu, ölkəmizin dünyada həyata keçirdiyi enerji layihələrinə, ümumilikdə enerji siyasətinə verdiyi qiymətin bariz göstəricisidir.
Bölmənin digər xəbərləri
