AZƏRBAYCANLILAR ÇERNOBIL AES-DƏ QƏZANIN NƏTİCƏLƏRİNİ ARADAN QALDIRANLARIN İLK SIRALARINDA OLMUŞLAR
Mitinq iştirakçıları abidənin önünə əklil qoyaraq, qəzanın nəticələrinin aradan qaldırılması zamanı həlak olanların xatirəsi qarşısında baş əymişlər.
Səfir Tələt Əliyev həlak olan çernobıllıların ailələrinə Azərbaycan hökuməti adından səmimi başsağlığı vermişdir. O, çıxışında demişdir ki, azərbaycanlılar həmişə qardaş Ukrayna xalqı ilə bir sırada olmuşlar. XX əsrin ən böyük texnogen qəzası sayılan Çernobıl faciəsi baş verən zaman həmvətənlərimiz keçmiş SSRİ-nin digər xalqlarının nümayəndələri ilə birlikdə həyatlarını və sağlamlıqlarını təhlükə altında qoyaraq, öz borcunu yerinə yetirmiş, bəşəriyyəti radiasiyanın ölümcül təsirindən və daha uzaqlara yayılmasından qorumuşlar. Bildirilmişdir ki, Azərbaycanda 4799 Çernobıl əlili yaşayır. Onlar daim dövlətin sosial qayğısını hiss edir və buna görə Prezident İlham Əliyevə minnətdardırlar. Hazırda Ukraynada Çernobıl qəzasını aradan qaldıran 11 azərbaycanlı yaşayır. Ölkəmizin Kiyevdəki səfirliyinin əməkdaşları şəxsi vəsaitlərindən onlara 5 min qrivna (1000 dollar) yardım etmişlər.
Aprelin 26-da Ukraynanın hər yerində matəm tədbirləri keçirilmişdir.
