“AZƏRENERJİ” ƏMƏK HAQQI ÜZRƏ BORCLARI ÖDƏYİR
“Azərenerji”nin mətbuat xidmətindən AZƏRTAC-a bildirmişlər ki, 2001-ci il dekabrın 1-nə sahə üzrə əmək haqqı borcu 60 milyard manatdan çox idi və bunun ödənilməsi 5-6 ay yubadılmışdı. Bundan əlavə, “Azərenerji”nin hökumətin zəmanəti ilə bir sıra layihələrin həyata keçirilməsi üçün götürdüyü kreditlərin ödənişi ilə bağlı gərgin vəziyyəti yaranmışdı. Lakin Azərbaycan Prezidenti Heydər Əliyevin təşəbbüsü ilə energetika sektorunda aparılan struktur dəyişiklikləri onun maliyyə vəziyyətinin möhkəmlənməsinə kömək etmişdir. İslahatların gedişində bəzi struktur bölmələri ləğv olunmuş, yaxud birləşdirilmiş, nəticədə ixtisarlar aparılmışdır.
“Azərenerji” SC kreditlər üzrə borcların vaxtında ödənilməsi mexanizmini də tənzimləməyə nail olmuşdur. Beləliklə, “Azərenerji” dünya maliyyə dairələrində özünün etibarlı və sabit tərəfdaş statusunu möhkəmləndirmiş və yaxın illərdə hasilatı artırmağa, Azərbaycanın milli energetika sisteminin etibarlılığını və təhlükəsizliyini yüksəltməyə imkan verən layihələr üzrə yeni kreditlər almışdır.
Bölmənin digər xəbərləri
