AZYAŞLI AVSTRALİYALILAR NƏNƏLƏRİNİN MAŞININDA GƏZMƏYƏ ÇIXMIŞLAR

14.06.2006 [22:09]
Çap et
A⁺ A^-

AZƏRTAC “Novosti” agentliyinə istinadla xəbər verir ki, 10 və 6 yaşlı avstraliyalı qardaşlar nənəsinin maşınında babasına baş çəkmək qərarına gəlmişlər. Maşını yaşca böyük qardaş sürərək, 100 kilometr məsafəni uğurla qət etmişdir.

Dəcəl uşaqlar, Yeni Cənubi Uels ştatının “Nyuell” avtomobil yolunun bəzi hissələrində sürəti saatda 90 kilometrədək artırmışlar.

Onları tapmaqda Avstraliya polislərinə ayıq avtomobil sürücüləri kömək göstərmişlər.

Polislər qanun pozucularına çatanda onlar əməllərini anlamış və valideynlərini gözləyirmiş kimi, arxa oturacağa keçmişlər.

Lakin 10 yaşlı “sürücü” avtomobilin motorunu söndürmədiyi üçün maşın hərəkətə gəlmiş və o, təzədən sürücü oturacağına keçməli olmuşdur. Yol patrulu onu bu vəziyyətdə yaxalamışdır.

Sevimli uşaqlarının qanunsuz gəzintisinə görə onların valideynləri cavab verməli olacaqlar.