BAKI BEYNƏLXALQ “ŞƏRQ-QƏRB” KİNOFESTİVALI DAVAM EDİR
Xəbər verdiyimiz kimi, Bakıda V Beynəlxalq “Şərq-Qərb” kinofestivalı keçirilir. MDB ölkələrinin və Baltikyanı ölkələrin Kinematoqrafçılar İttifaqları Konfederasiyasının köməyi ilə Azərbaycanda dünya kinosunun 100 illiyi Fondu və respublika Kinematoqrafçılar İttifaqı tərəfindən təşkil olunmuş festivalda Türkiyə, Almaniya, Çexiya və digər dövlətlərin kino xadimləri də iştirak edirlər.
Oktyabrın 14-də kinofestival çərçivəsində “Azərbaycan” kinoteatrında rusiyalı rejissor Andrey Osipovun “Səslər”, “Mələk ovu və ya şairin və kahinin dörd məhəbbəti”, “Et setera” sənədli filmləri göstərildi. “Səslər” filmi rus poeziyasının görkəmli nümayəndələrindən biri, şair və filosov Maksimilian Voloşindən bəhs edir.
“Mələk ovu və ya şairin və kahinin dörd məhəbbəti”ndə isə rus poeziyasının digər parlaq simalarından olan Andrey Belıdan söhbət açılır.
Rusiyanın hərb tarixindən bəhs edən “Et setera” sənədli filmi 2000-ci ildə Moskvada keçirilmiş “Stalker” beynəlxalq kinofestivalında xüsusi “Sores” mükafatına layiq görülmüşdür.
Elə həmin gün “Azərbaycan” kinoteatrında özbək rejissoru Yusup Razıkovun “Yoldaş Boykenjayev”, tanınmış rus rejissoru Andrey Xrjanovskinin “Bir yarım pişik” və rus rejissoru Nikolay Lebedevin “Pərəstişkar” filmləri də nümayiş etdirildi.
Bölmənin digər xəbərləri
