MƏDƏNİYYƏT
BAKI CAZ KLUBUNDA KOMPAKT DİSKİN TƏQDİMAT MƏRASİMİ
Bakı caz klubunda 2001-ci ilin aprelində Bakıda keçirilmiş birinci “Kaspiən caz ənd blüz” festivalında səslənən ən yaxşı caz improvizasiyalarının daxil edildiyi kompakt-diskin təqdimat mərasimi olmuşdur. 2000 ədəd tirajla buraxılmış alboma Azərbaycanın tanınmış caz ifaçıları Vaqif Sadıqovun, Emil Məmmədovun, Ruslan Ağababayevin, Rain Sultanovun, Əminə Fiqarovanın, “Bakustik caz” qrupunun improvizasiyları, habelə əcnəbi musiqiçilərin caz əsərləri daxildir. Məşhur “Ana yurdum Azərbaycan” mahnısı tanınmış müğənni Koko Yorkla birlikdə “Bəri bax” vokal ansamblının ifasında yazılmışdır.
Kompakt-disk “Qaradağ sement” şirkətinin maliyyə yardımı ilə Hollandiyada buraxılmışdır.
İkinci caz və blüz musiqisi festivalının da ölkəmizin paytaxtında keçirilməsi nəzərdə tutulur. İndi ona hazırlıq görülür, sponsorlar axtarılır, habelə festival iştirakçıları ilə iş aparılır.
Gözlənildiyinə görə, ikinci festivalda Qazaxıstan, Qırğızıstan, Hollandiya, ABŞ və başqa ölkələrin cazmenləri iştirak edəcəklər. Seminarlar, görüşlər, ustad dərsləri keçirilməsi də nəzərdə tutulur. Bu tədbirlərdə Azərbaycanın ən istedadlı caz ifaçıları aşkara çıxarılacaqdır.
Bölmənin digər xəbərləri
