BAKI DƏRİN ÖZÜLLƏR ZAVODU “ƏSRİN MÜQAVİLƏSİ”NƏ TÖHFƏ VERİR
Müəssisədən AZƏRTAC-a bildirmişlər ki, ötən müddət ərzində 163 metrədək dərinlikdə 13 dəniz platforması hazırlanmışdır. 2001-ci ilin avqustundan - Xəzər dənizinin Azərbaycan bölməsində yerləşən “Azəri”, “Çıraq”, “Günəşli” yataqlarının dərinlikdə yerləşən hissəsinin tammiqyaslı işlənməsinin birinci fazası start götürdükdən sonra zavodun fəaliyyətində də dönüş yaranmış, işlərin miqyası daha da genişlənmişdir. Ümumiyyətlə, müəssisədə işlər üç faza daxilində bağlanmış müqavilələr əsasında görülür. 2001-ci ildən başlamış bu fəaliyyət proqramı 2007-ci ilin sonunadək davam etdiriləcəkdir. Müqaviləyə əsasən 1 milyon 20 min tonluq 6 dayaq özülü, 60 min tonluq 86 paya (svay), 2 min tonluq 4 qazma dəniz dibi quyu başlığı, 15 min tonluq göyərtə hazırlanmalıdır.
Zavod ABŞ-ın “MakDermott” şirkəti ilə sıx əməkdaşlıq edir. Şirkətin Xəzərdəki fəaliyyəti ilə bağlı istehsalat işləri, dənizdə aparılan işlərə yardım bazası, Xəzəryanı idarəetmə qrupu burada yerləşir.
Bu gün müəssisədə həm dayaq bloklarının, həm də üst tikililərin hazırlanmasında 6 minə yaxın fəhlə, mühəndis-texniki işçi çalışır. Onların 80 faizdən çoxu yerli kadrlardır.
Xatırladaq ki, təməli 1978-ci ildə qoyulmuş və 1984-cü ildə işə salınmış bu zavodun Azərbaycanda tikilməsi ümummilli liderimiz Heydər Əliyevin iradəsi və qətiyyəti sayəsində mümkün olmuşdur.
Bölmənin digər xəbərləri
