Bakı, 9 aprel (AZƏRTAC). Aprelin 9-da Bakı Dövlət Universitetində (BDU) bu ali məktəbin elmi şurasının 2013-cü ildə yerinə yetirilmiş tədqiqat işlərinin nəticələrinə həsr olunmuş iclası keçirilmişdir.

AZƏRTAC xəbər verir ki, elmi şuranın üzvlərinin, alim və mütəxəssislərin iştirak etdikləri iclasda çıxış edən BDU-nun rektoru, Milli Məclisin deputatı, akademik Abel Məhərrəmov dahi rəhbər, ümummilli lider Heydər Əliyevin elmə, təhsilə daim xüsusi önəm verdiyini, Ulu Öndərin ideyalarının Azərbaycan Prezidenti İlham Əliyev tərəfindən uğurla həyata keçirildiyini bildirmişdir.

Müasir dünyada elmin, təhsilin mühüm rolunu xatırladan rektor Azərbaycan Prezidenti İlham Əliyevin bu sahənin inkişafına göstərdiyi böyük diqqət və qayğıdan danışmışdır.

Bakı Dövlət Universitetində uğurlu elmi-tədqiqatların, təhsilin inkişafı üçün səmərəli tədbirlərin reallaşdırıldığını diqqətə çatdıran akademik A.Məhərrəmov qeyd etmişdir ki, elm və təhsilin əlaqələndirilməsi, innovasiyaların tətbiqi və aparılan islahatlar nəticəsində 2013-cü ildə BDU “QS World University Rankings-2012” reytinqinə görə dünyanın 700 top universitetinin, Beynəlxalq Akademik Perspektivlər İnstitutu (URAP) tərəfindən dünyanın ən yaxşı 2 min universitetinin, həmçinin MDB-yə üzv ölkələrin universitetləri üzrə reytinq siyahısına daxil edilmişdir. MDB-yə üzv ölkələr üzrə 153 universitet arasında aparılan sorğuya əsasən, BDU 40-cı pillədə qərarlaşmışdır.

BDU-nun elm və innovasiyalar üzrə prorektoru, professor Aydın Kazımzadə hesabat məruzəsi ilə çıxış edərək 2013-cü ildə yerinə yetirilmiş elmi-tədqiqatlardan bəhs etmişdir.

Bildirilmişdir ki, Bakı Dövlət Universitetinin 17 fakültəsinin 125 kafedrasında, 2 elmi-tədqiqat institutunda, 4 elmi-tədqiqat mərkəzində və 24 elmi-tədqiqat laboratoriyasında elmin müxtəlif istiqamətlərinə aid fundamental və tətbiqi xarakterli tədqiqatlar aparılmışdır.

İl ərzində BDU-da təbiət və humanitar elm sahələrini əhatə edən bir sıra aktual mövzuların həllinə yönəlmiş 81 istiqamətdə 199 mövzu üzrə 1094 elmi iş yerinə yetirilmişdir. Universitetdə fəaliyyət göstərən 9 daimi və 15 birdəfəlik dissertasiya şuralarında 62 nəfər ixtisas üzrə elmlər doktoru və fəlsəfə doktoru elmi dərəcəsi almaq üçün dissertasiya (onlardan 38 nəfəri BDU-nun əməkdaşı, doktorantı və dissertantıdır) müdafiə etmişdir.

Professor-müəllim heyəti və əməkdaşlar tərəfindən 77 monoqrafiya, 66 kitab, 73 dərslik, 131 dərs vəsaiti, 2681 məqalə (1987 məqalə respublikada, 694 məqalə xaricdə), 1176 tezis (487 tezis respublikada, 689 tezis xaricdə), 23 metodik göstəriş, 372 proqram nəşr etdirilmişdir.

Xaricdə nəşr olunmuş 694 məqalədən 155-ı, yəni bütün xaricdə nəşr olunmuş məqalələrin 22,3 faizi impakt faktorlu jurnallarda nəşr olunmuşdur.

Hesabat dövründə BDU-nun əməkdaşları tərəfindən 14 patent alınmışdır.

Universitet alimlərinin xaricdə nəşr olunmuş kitabları barədə məlumat verən professor A.Kazımzadə qeyd etmişdir ki, bu kitablar kimya, fizika, mexanika-riyaziyyat, tətbiqi riyaziyyat və kibernetika, biologiya, tarix, filologiya, hüquq, beynəlxalq münasibətlər və iqtisadiyyat, sosial elmlər və psixologiya fakültələrinin, fizika problemləri ETİ-nin əməkdaşları tərəfindən yazılmış və ABŞ, Almaniya, Rusiya, Türkiyə və İran İslam Respublikasının nəşriyyatlarında çap olunmuşdur.

Universitetin əməkdaşları tərəfindən 88 (51 beynəlxalq və 37 respublika daxili) elmi layihə həyata keçirilmişdir. Bu layihələr Avropa İttifaqının 7-ci Çərçivə (FP-7), Erasmus Mundus və TEMPUS proqramları, Ukrayna Elm və Texnologiya Mərkəzi, Fransanın Milli Elmi Araşdırmalar Mərkəzi, NATO-nun “Elm sülhün keşiyində” proqramı, İsveçrə Milli Elm Fondu, Almaniyanın “Folsfagen” şirkəti, Dünya Bankı, Azərbaycan Respublikasının Prezidenti yanında Elmin İnkişafı Fondu və digər yerli və xarici təşkilatlar tərəfindən maliyyələşdirilir.

Diqqətə çatdırılmışdır ki, hesabat ilində Bakı Dövlət Universitetinin elmi kitabxanası uğurlu fəaliyyət göstərmişdir. Təhsil Nazirliyinin müvafiq əmrinə əsasən, ali məktəb kitabxanaları üzrə elmi-metodiki mərkəz kimi fəaliyyət göstərən elmi kitabxana 22 dövlət və bəzi özəl ali məktəb kitabxanalarına metodiki köməklik göstərir, 21 ölkənin 49 universiteti və beynəlxalq nəşriyyatı ilə informasiya mübadiləsi aparır.

Bakı Dövlət Universitetində dörd seriyada “Bakı Universitetinin xəbərləri” jurnalı və digər 14 elmi, nəzəri, metodik və təcrübi jurnallar, o cümlədən impakt faktorlu “Applied and computational mathematics” jurnalı öz fəaliyyətlərini davam etdirmişlər.

Ötən il BDU-nun nəzdindəki “Gənc istedadlar” liseyini dörd buraxılış üzrə 142 şagird bitirmiş və onların hamısı nüfuzlu ali məktəblərə (o cümlədən 44-ü BDU-ya) daxil olmuşdur.

Universitetin professor-müəllim heyətinin rəhbərliyi ilə lisey şagirdləri tərəfindən təqdim olunmuş 10 layihə “Sabahın alimləri” respublika müsabiqəsində I, II və III yerləri tutmuşdur. Həmin müsabiqə nəticəsində may ayında ABŞ-da keçirilən yekun müsabiqəyə göndərilmək üçün seçilən 3 işdən 2-si lisey şagirdlərinin olmuşdur. Bu il keçirilən “Sabahın alimləri” müsabiqəsində liseyin 9 şagirdi 5 layihə ilə iştirak etmişdir. Müsabiqə nəticəsində 3 layihə (4 şagird) birinci yeri, 1 layihə (3 şagird) ikinci yeri, 1 layihə (2 şagird) üçüncü yeri tutmuşdur. Bu ilin may ayında ABŞ-da keçiriləcək “Sabahın alimləri” Beynəlxalq müsabiqəsində respublikamızı təmsil edəcək 3 layihədən biri BDU-nun nəzdindəki “Gənc istedadlar” liseyinin şagirdlərinə məxsusdur.

Ötən il Beynəlxalq Mendeleyev Olimpiadasına göndərilən 5 nəfərdən 2-si lisey şagirdləri olmuşdur. Həmçinin liseyin 2 tələbəsi Ətraf Mühitin Mühafizəsi üzrə VII Beynəlxalq Layihə Olimpiadasının (İNEPO-AVRASİYA) qalibi olmuş və qızıl medala layiq görülmüşdür.

Diqqətə çatdırılmışdır ki, Bakı Dövlət Universitetinin professor-müəllim heyətinin, əməkdaşların, doktorant, magistrant və tələbələrin elm və təhsildə, ali məktəbin ictimai həyatında əldə etdikləri nailiyyətləri daha da inkişaf etdirmək məqsədilə BDU-nun rektoru, akademik A.Məhərrəmovun müvafiq əmri ilə universitetdaxili “50+50” qrant proqramı təsis edilmişdir. Müvafiq komissiyanın qərarı və rektorun əmri ilə 25 professor-müəllim heyətinə, 20 gənc (35 yaşa qədər) professor-müəllim heyətinə, 10 nəfər doktorant, dissertant və magistrant və 11 nəfər tələbə 2012-2013-cü illər ərzində 4-cü müsabiqənin qalibi elan edilmişdir və onlara universitetin xüsusi vəsaiti hesabına qrant verilmişdir.

Hesabat dövründə Bakı Dövlət Universitetinin beynəlxalq əlaqələrinin genişləndiyini vurğulayan professor A.Kazımzadə il ərzində respublikada və xarici ölkələrdə fəaliyyət göstərən 53 elmi təşkilat və ali təhsil müəssisəsi ilə Anlaşma memorandumlarının və əməkdaşlığa dair müqavilələr imzalandığını bildirmişdir.

Elmi şuranın iclasında cari məsələlər də müzakirə olunmuşdur.