Bakı və Sofiya arasında yaşıl körpü: Universitetlər əməkdaşlığa hazırlaşır
Sofiya, 15 may, AZƏRTAC
Azərbaycanın Bolqarıstandakı səfirliyinin təşəbbüsü ilə “Sinerjinin Gücü: Enerji Təhlükəsizliyi və Yaşıl Keçid” mövzusunda işçi səhər yeməyi keçirilib.
AZƏRTAC xəbər verir ki, tədbirdə aparıcı Bolqarıstan universitetlərinin nümayəndələri, enerji, yaşıl iqtisadiyyat və davamlı şəhərsalma üzrə mütəxəssisləri və digər tərəflər 2026-cı il üçün Sofiyada keçirilməsi planlaşdırılan yüksəksəviyyəli müvafiq dəyirmi masa və hər iki ölkənin universitetləri arasında potensial konkret əməkdaşlıq layihələrinin hazırlanması ilə bağlı fikir mübadiləsi aparıblar.
Müzakirə enerji təhlükəsizliyi, yaşıl keçid, dairəvi iqtisadiyyat, dayanıqlı şəhər inkişafı, texnoloji innovasiya və elmi tərəfdaşlıq sahələrində Azərbaycan-Bolqarıstan tərəfdaşlığının gücləndirilməsi imkanlarına, eyni zamanda, daha geniş regional və enerji dayanaqlılığının araşdırılmasına yönəlib.
Tədbirdə Müqəddəs İvan Rilski adına Bolqarıstanın Mədən və Geologiya Universitetinin, Müqəddəs Kliment Oxridski Sofiya Universitetinin, Bolqarıstanın Milli və Dünya İqtisadiyyatı Universitetinin, Bolqarıstanın Memarlıq, İnşaat Mühəndisliyi və Geodeziya Universitetinin, həmçinin SOCAR-ın Sofiyadakı nümayəndəliyinin təmsilçisi və Azərbaycan Milli Elmlər Akademiyasının vitse-prezidenti iştirak ediblər. Müzakirələrdə iştirakçılar enerjinin şaxələndirilməsinin təmin edilməsində, dayanıqlı enerji infrastrukturun gücləndirilməsində və enerji balansının tərkibində daha təmiz və daha dayanıqlı enerji sistemləri ilə balanslaşdırılmasında regional əməkdaşlığın artan əhəmiyyətini vurğulayıblar. Milli və şəhərlər səviyyəsində enerji təhlükəsizliyi, yaşıl transformasiya və yeni dayanıqlı iş yerlərinin yaradılmasına innovasiyayönümlü yanaşmaların dəstəklənməsində elmi institutların və elmi əməkdaşlığın roluna xüsusi diqqət yetirilibdir.
Müzakirələrdə, həmçinin Azərbaycanın COP29 və qarşıdan gələn Ümumdünya Şəhərsalma Forumu (WUF13) kimi əsas beynəlxalq platformalar vasitəsilə artan qlobal töhfəsi vurğulanıb ki, bu da ölkənin iqlim fəaliyyəti, davamlı şəhər inkişafı və tarazlı yaşıl keçid üzrə beynəlxalq dialoqun inkişaf etdirilməsinə və bu sahələrdə uzunmüddətli qlobal təşəbbüslərinin yaradılmasına sadiqliyini əks etdirir.
İştirakçı universitetlərin nümayəndələri Azərbaycan və Bolqarıstan universitetləri arasında bərpaolunan enerji, nüvə enerjisi, şəhər dayanıqlığı, sənaye innovasiyası və elmi mübadilə kimi sahələrdə tərəfdaşlığın gücləndirilməsinin vacibliyini vurğulayıblar. İştirakçılar, həmçinin dövlət-özəl-elmi tərəfdaşlığın ortaya çıxan regional və qlobal enerji çağırışlarının həllində strateji əhəmiyyətini bildiriblər.
Görüş, həmçinin səfirliyin təşəbbüsü ilə 2026-cı ildə Sofiyada keçirilməsi planlaşdırılan, enerji təhlükəsizliyi və yaşıl keçid üzrə sinerjinin təmin edilməsi üzrə dialoq və əməkdaşlığı daha da inkişaf etdirmək üçün siyasətçiləri, universitetləri, elmi dairələri, özəl sektoru və beynəlxalq mütəxəssisləri bir araya gətirəcəyi gözlənilən müvafiq yüksəksəviyyəli dəyirmi masaya hazırlıq platforması rolunu oynayıb.
Bölmənin digər xəbərləri
