Bakıda AİPS - Avropanın hesabat-seçki konfransı keçirilmişdir VİDEO
Bakı, 27 aprel (AZƏRTAC, Səxavət Quliyev, Rəşad İsmayılov). Aprelin 27-də Bakıda Beynəlxalq İdman Mətbuatı Assosiasiyasının (AİPS) 77-ci konqresi çərçivəsində qurumun Avropa üzrə hesabat-seçki konfransı keçirilmişdir.
AZƏRTAC xəbər verir ki, tədbirdə çıxış edən AİPS-in prezidenti Canni Merlo Bakıda təşkil olunacaq konqresin gündəliyi barədə məlumat vermişdir. O bildirmişdir ki, tədbir çərçivəsində Azərbaycanda təşkil olunacaq birinci Avropa Oyunlarının təqdimatı keçiriləcək və müxtəlif mövzularda müzakirələr aparılacaqdır.
AİPS - Avropanın prezidenti Yanis Daras rəhbərlik etdiyi qurumun fəaliyyəti barədə məlumat vermişdir. Həyata keçirilən layihələrdən danışan Y.Daras yüksək təşkilatçılığa görə Azərbaycana minnətdarlığını bildirmişdir.
Görülən işlər barədə hesabatla çıxış edən Y.Daras AİPS - Avropanın İcraiyyə Komitəsinin üzvlərinin suallarını cavablandırmışdır.
Maliyyə və digər komissiyaların hesabatları dinlənildikdən sonra İcraiyyə Komitəsinin tərkibi yenidən seçilmişdir.
Azərbaycan İdman Jurnalistləri Assosiasiyasının (AİJA) prezidenti Eldar İsmayılov İcraiyyə Komitəsinə üzv seçilmişdir.
Bölmənin digər xəbərləri
