Bakı, 25 yanvar (AZƏRTAC). Yanvarın 25-də “Park Bulvar” Ticarət və Əyləncə Mərkəzində bu qurumun və “British Council-Azərbaycan” təşkilatının birgə təşkilatçılığı ilə dahi ingilis yazıçısı Çarlz Dikkensin 200 illik yubileyinə həsr olunmuş fotosərgi açılmışdır.

AZƏRTAC xəbər verir ki, bu münasibətlə keçirilən tədbirdə “British Council” təşkilatının Azərbaycan üzrə direktoru Pol Klementson bildirmişdir ki, cari il fevralın 7-də dahi ingilis yazıçısı Çarlz Dikkensin anadan olmasının 200 illiyi tamam olur. Bununla əlaqədar olaraq “British Council” 2012-ci ili “Çarlz Dikkens İli” elan etmişdir. Anadan olmasından iki yüz il keçməsinə baxmayaraq Çarlz Dikkens bugünədək Böyük Britaniyanın mədəniyyət səfiri və ingilis ədəbiyyatının tanınmış siması hesab edilir. “Dikkens-2012” layihəsi çərçivəsində Azərbaycanda bir sira tədbirlərin keçirildiyindən danışan P.Klementson qeyd etmişdir ki, məqsəd dahi yazıçının yaradıcılıq irsinin yada salınması və geniş təbliğidir.

P.Klementson gənclərin istedadının üzə çıxarılmasında və onların ictimaiyyətə tanıdılmasında sərginin böyük əhəmiyyətini qeyd edərək bildirmişdir ki, burada 12 yerli fotoqrafın 32 əsəri nümayiş etdirilir. Onlar Ç.Dikkensin “Boz”un eskizləri” əsərindən seçdikəri epizodlara uyğun olaraq çəkdikləri şəkillərlə layihəyə qatılmışlar. Bu müəlliflər ötən ilin dekabrında britaniyalı fotoqraf Suzan Parkhil tərəfindən keçirilmiş təlimin iştirakçılarıdır.

Bildirilmişdir ki, layihənin yekun tədbiri fevralın 4-də Azərbaycan Dövlət Gənc Tamaşaçılar Teatrında keçiriləcəkdir.

Tədbirdə teatrın gənc aktyorları dahi yazıçının “Oliver Tvist” əsərindən bir parçanı göstərmişlər.

Sonda tədbir iştirakçıları fevralın 8-dək davam edəcək sərgi ilə tanış olmuşlar.