BAKIDA KƏND TƏSƏRRÜFATI MƏHSULLARININ NÖVBƏTİ SATIŞ YARMARKALARI KEÇİRİLMİŞDİR
AZƏRTAC xəbər verir ki, sentyabrın 6-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.
“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul, Göyçay və digər rayonlardan müxtəlif çeşidli kənd təsərrüfatı məhsulları gətirilmişdi.
Gədəbəyin Çalburun kəndindən Arzu Tanrıquliyev satışa 10 ton kartof, 300 kiloqram pendir, süd məhsulları, bal, alma, armud çıxarmışdı. O, iki ildir ki, bu yarmarkada məhsul satdığını və yaradılmış şəraitdən razılığını bildirdi.
Yarmarkada çoxluq təşkil edən soğan, alma və kələm 50 qəpiyə satılırdı. Paytaxt sakinləri bazardakından xeyli ucuz olan məhsulları həvəslə alırdılar.
A.Şərifzadə küçəsi, 194, metronun “İnşaatçılar” stansiyasının 200 metrliyindəki yarmarkaya Salyan, Qusar, Dəvəçi, Xaçmaz və digər rayonlardan 78 tondan çox müxtəlif çeşidli kənd təsərrüfatı məhsulları gətirilmişdi.
Kənd Təsərrüfatı Nazirliyinin nümayəndələri bildirdilər ki, burada satılan məhsulların qiymətləri bazardakından 25 faizə qədər ucuzdur. Ərazisi genişləndirilmiş yarmarkada sərbəst alış-veriş etmək üçün hər cür şərait yaradılmışdır.
Alıcılardan Ramazan Babayev, Sona Qarayeva müxtəlif çeşidli kənd təsərrüfatı məhsullarını böyük həvəslə alır və bu işi təşkil edənlərə öz minnətdarlıqlarını bildirirdilər.
Badamdar qəsəbəsinin mərkəzində 9, 7 və 5 mərtəbəli binaların həyətində, 239 nömrəli məktəbin yaxınlığındakı yarmarkada satışa Ağdaş, Salyan, Sabirabad və digər rayonlardan 14 tondan çox məhsul çıxarılmışdır.
Kənd Təsərrüfatı Nazirliyinin nümayəndəsi Məmməd Həziyev bildirdi ki, yarmarkada pomidor, kartof və soğanın kiloqramı 30, badımcan 40, üzüm 60-80 qəpiyə, mal əti 4 manat 50 qəpiyə təklif edilir.
Qəsəbə sakinlərinin sözlərinə görə yarmarkada məhsulların keyfiyyətinə və qiymətlərinə ciddi nəzarət olunur. Burada qiymətlər bazardakından 20-25 faiz aşağıdır.
Metronun “Əhmədli” stansiyasının yaxınlığında, “Azər” ticarət mərkəzində şəhər sakinləri Salyan, Kürdəmir, Quba, Şəmkir, Ağcabədi, Qax, Biləsuvar və Qəbələ rayonlarından gətirilmiş meyvə-tərəvəz, ağartı, bostan və konserv məhsullarını həvəslə alırdılar. Yarmarkada kartof, pendir, üzüm daha çox alınırdı.
Kənd Təsərrüfatı Nazirliyinin nümayəndəsi Namiq Qüdrətov bildirdi ki, bu gün rayonun ərazisində fəaliyyət göstərən yarmarkada satışa 263 tondan çox məhsul çıxarılmışdır. Qiymətlər bazardakından 20-25 faiz aşağıdır.
Suraxanıda “Günəş” ticarət mərkəzindəki yarmarkada Balakən, Qobustan, Samux, Daşkəsən, Quba, Biləsuvar rayonlarının fermerləri satışa 56 tondan çox məhsul çıxarmışlar.
Kənd Təsərrüfatı Nazirliyinin nümayəndəsi Mustafa Rüstəmov demişdir ki, yarmarkada satılan məhsulların qiyməti bazardakından 30-35 faizə qədər ucuzdur. Satışda meyvə- tərəvəz, bitkiçilik məhsulları, ət-süd məmulatları, konservləşdirilmiş məhsullar boldur. Alıcılar məhsulun qiymətindən və keyfiyyətindən razıdırlar.
“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerləri satışa qiyməti bazardakından 30-35 faiz ucuz olan 12 tondan çox məhsul çıxarmışlar.
Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkada sakinlər Qazax və Ağsu rayonlarından gətirilmiş müxtəlif çeşiddə təzə və keyfiyyətli meyvə-tərəvəzi, süd məhsullarını həvəslə alırdılar. Onlar təklif olunan məhsulların qiymətlərinin bazardakından xeyli ucuz olduğunu bildirirdilər. Kənd Təsərrüfatı Nazirliyi nümayəndəsinin verdiyi məlumata görə, yarmarkaya 27,7 ton məhsul gətirilmişdir.
Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada bolluq nəzərə çarpırdı. Burada satılan məhsulların da qiymətləri bazardakından 20-30 faiz ucuz idi.
Nərimanov rayonunda Əliyar Əliyev küçəsi 26-da təşkil olunmuş yarmarkada Xaçmaz, Tərtər, İmişli, Tovuz, Beyləqan, Oğuz, Daşkəsən, Neftçala və digər rayonların fermerləri satışa 49 ton meyvə-tərəvəz, ət və süd məmulatları, konserv məhsulları çıxarmışdılar.
Giləzi və İmişli broyler fabriklərinin nümayəndələri isə alıcılara quş əti və 10 min ədəd yumurta təklif edirdilər.
######
 |
 |
Bölmənin digər xəbərləri
