Bakıda Regional Rabitə Birliyinin Rabitə Administrasiyaları Başçıları Şurasının 54-cü iclası keçirilib
Bakı, 3 dekabr, AZƏRTAC
“Bakutel 2018” XXIV Azərbaycan Beynəlxalq Telekommunikasiya, İnnovasiya və Yüksək Texnologiyalar sərgi-konfransı çərçivəsində dekabrın 3-də Bakıda Regional Rabitə Birliyinin (RRB) Rabitə Administrasiyaları Başçıları Şurasının 54-cü iclası keçirilib.
AZƏRTAC xəbər verir ki, iclasda RRB Rabitə Administrasiyalarının nümayəndə heyətlərinin Beynəlxalq Telekommunikasiya İttifaqının (BTİ) builki Səlahiyyətli Konfransında fəaliyyəti ilə bağlı yekunlar, eləcə də RRB İcraiyyə Komitəsinin Rabitə Administrasiyaları Başçıları Şurasının qərarlarının həyata keçirilməsi üzrə fəaliyyəti kimi əsas məsələlər müzakirə olunub.
Tədbirdə RRB-nin tamhüquqlu üzvlərinin - Azərbaycan, Belarus, Qazaxıstan, Qırğızıstan, Rusiya, Tacikistan, Türkmənistan və RRB müşahidəçiləri - Latviya və Sloveniya rabitə administrasiyalarının, “İntersputnik” Beynəlxalq Kosmik Rabitə Təşkilatının, eləcə də, ”EUTELSAT” Beynəlxalq Peyk Təşkilatının və Beynəlxalq Telekommunikasiya İttifaqının MDB ölkələri üzrə nümayəndə heyətləri iştirak edib.
İclasa RRB Şurası və Koordinasiya Şurasının sədri, Rusiya Federasiyasının Rəqəmli inkişaf, rabitə və kütləvi kommunikasiyalar naziri Konstantin Noskov sədrlik edib.
Tədbir iştirakçılarını salamlayan Azərbaycan Respublikasının nəqliyyat, rabitə və yüksək texnologiyalar nazirinin müavini Elmir Vəlizadə ötən iclasda Azərbaycan tərəfinin Bakıda növbədənkənar iclasın keçirilməsi təklifini dəstəklədiklərinə görə RRB-nin üzv dövlətlərinə təşəkkürünü bildirib.
“Bugünkü iclasda əsas müzakirə edəcəyimiz məsələlərdən biri 29 oktyabr - 16 noyabr tarixlərində Dubayda keçirilmiş Beynəlxalq Telekommunikasiya İttifaqının Səlahiyyətli Konfransının yekunlarıdır. Bu hadisə təmsil olunduğumuz sektor üçün çox vacibdir və məhz bu səbəbdən biz bu cür təcili iclasın keçirilməsini zəruri saydıq”, - deyə nazir müavini bildirib.
E.Vəlizadə RRB-yə daxil olan administrasiyaların Səlahiyyətli Konfransda səmərəli birgə fəaliyyətini, eyni zamanda RRB-nin İcraiyyə Komitəsinin onların fəaliyyətinin əlaqələndirilməsi üzrə işini yüksək qiymətləndirib.
“Fürsətdən istifadə edərək, Rusiya Federasiyasını seçkilərdə qazandığı gözəl nəticələr münasibəti ilə təbrik edirəm. Eyni zamanda, Azərbaycan Respublikasının BTİ-nin Şurasına yenidən seçilməsini dəstəkləyən bütün tərəflərə minnətdarlığımı bildirirəm. Nəticədə Azərbaycan da, Rusiya kimi, Regional Rabitə Birliyinin tarixində ardıcıl olaraq ikinci dəfə BTİ Şurasına üzv seçilən ölkə oldu. Bizim rabitə administrasiyamızın nümayəndəsinin BTİ-nin Radio Tənzimləmə Komitəsinə seçilməsi də yüksək nailiyyətdir”, - deyə nazir müavini vurğulayıb.
E.Vəlizadə seçkilər zamanı Azərbaycanın ədalətli və layiqli təşviqat kampaniyası apardığını qeyd edib. “Biz birlikdə Şurada təmsilçiliyimizi gücləndirməyə çalışırdıq. Qazanılan nəticə bizim RRB-də birgə fəaliyyətimizin bəhrəsidir. Bugünkü iclasda bizim RRB çərçivəsində birgə fəaliyyətimizə aid olan digər məsələlər də müzakirə olunacaq. Əminəm ki, iclasda qəbul ediləcək qərarlar rabitə administrasiyalarımız arasında faydalı əməkdaşlığı daha da genişləndirəcək”, - deyən nazir müavini iclas iştirakçılarına uğurlu və səmərəli iş arzulayib.
İclas iştirakçıları RRB nümayəndə heyətlərinin BTİ Səlahiyyətli Konfransında işini yüksək qiymətləndirib. Bildirilib ki, BTİ katibliyi 29 təklif əsasında builki Səlahiyyətli Konfransda baxılmaq üçün 35 sənəd tərtib edib.
Məlumat verilib ki, RRB tərəfindən Səlahiyyətli Konfransın ilk plenar iclasında BTİ-nin 2020-2023-cü illər üçün strateji və maliyyə planlarının hazırlanması üzrə ümumi təklifindən biri təsdiq edilib.
İclasda müzakirə edilən digər vacib məsələ RRB iştirakçı ölkələrində rəqəmli inkişaf ilə əlaqədar olub. Bu məsələ ilə bağlı fikir mübadiləsi prosesində iştirakçılar rəqəmli inkişafla bağlı prioritet vəzifələri və həll yollarını müzakirə edib. Bundan başqa, informasiya cəmiyyətinin inkişafı üzrə Azərbaycan rabitə administrasiyası tərəfindən hazırlanan RRB iştirakçı ölkələrində rəqəmli bazarın inkişafı üzrə göstəricilərin hesablanması metodikası nəzərdən keçirilib.
İclas iştirakçılarının müzakirə etdiyi növbəti mühüm məsələ RRB iştirakçı ölkələrində Dayanıqlı İnkişaf Məqsədlərinin həyata keçirilməsi olub.
Həmçinin 1997-ci il 17 yanvar tarixli “Mobil rabitə sistemlərinin inkişafı və istifadəsində əməkdaşlıq haqqında” Sazişə düzəlişlərin edilməsi ilə bağlı məsələyə də baxılıb.
Məlumat üçün bildirək ki, MDB hökumət başçılarının cari il noyabrın 2-də Astanada keçirilən iclasında “Mobil rabitə sistemlərinin inkişafı və istifadəsində əməkdaşlıq haqqında” Sazişə düzəlişlər haqqında Protokol imzalanıb.
İclasda həmçinin RRB iştirakçı ölkələrində informasiya cəmiyyətinin inkişafına xidmət məqsədilə mövcud olan Yüksək səviyyəli işçi qrupunun əsasnaməsinə düzəlişlər edilib. İşçi qrupun sədrinin daimi əsaslarla fəaliyyəti Əsasnamədə təsbit olunub. Şuranın qərarına əsasən Azərbaycan nümayəndəsi Elmir Vəlizadə işçi qrupun sədri təyin edilib.
Tədbirin sonunda BTİ-nin Səlahiyyətli Konfransının işində fəal iştirak etmiş şəxslər orden və medallarla, həmçinin fəxri fərmanlarla təltif olunub. Təltif olunanlar sırasında, əsasən Rusiya və Azərbaycan nümayəndələri, həmçinin digər administrasiyaların və İcraiyyə Komitəsinin təmsilçiləri olub.
Rusiya Federasiyasının Rəqəmli inkişaf, rabitə və kütləvi kommunikasiyalar naziri Konstantin Noskov və Azərbaycanın nəqliyyat, rabitə və yüksək texnologiyalar naziri Ramin Quluzadə RRB-nin ordeni ilə təltif ediliblər.
Bölmənin digər xəbərləri
