BAKIDA ŞƏRQİ AVROPA REGİONAL ANTİDOPİNQ TƏŞKİLATININ İCLASI KEÇİRİLƏCƏKDİR
Gənclər və İdman Nazirliyindən AZƏRTAC-a bildirmişlər ki, oktyabrın 21-də Bakıda Şərqi Avropa Regional Antidopinq Təşkilatının (RADA) idarə rəhbərləri şurasının növbəti 4-cü iclası keçiriləcəkdir.
Hər 6 aydan bir keçirilən iclasa sonuncu dəfə mart ayında Rusiya “ev sahibliyi” etmişdir.
Şərqi Avropa ölkələrinin dopinqə qarşı birgə mübarizə aparmaları məqsədi ilə keçirilən tədbirə Belarus, Gürcüstan, Rusiya, Serbiya, Ukrayna və digər ölkələrin nümayəndələri qatılacaqlar. Konfransda dopinq haqqında qanun, idarə heyəti şurasının tərkibinin artırılması, müxtəlif ölkələrin dopinq sahəsində problemlərinin müzakirəsi və digər məsələlər müzakirə olunacaqdır.
Konfransın birinci günü 12 dövlətin qarşılıqlı əməkdaşlığına dair saziş imzalanacaqdır. Növbəti iki gündə isə xarici ekspertlərin (həkim və hüquqşünaslar) iştirakı ilə testlərin nəticələrinin araşdırılması və “idmançılar hansı şərtlər altında qadağan olunmuş dərman preparatlarından istifadə edə bilərlər” mövzularında treninqlər keçiriləcəkdir.
Bölmənin digər xəbərləri
