BAKIDA YENİDƏN BƏRPA OLUNMUŞ NOBEL QARDAŞLARI İQAMƏTGAHININ AÇILIŞI OLMUŞDUR
AZƏRTAC xəbər verir ki, aprelin 25-də Bakıda Nobel qardaşları iqamətgahının - “Villa Petrolea”nın əsaslı təmirdən sonra açılışı olmuşdur. Bərpa işləri Bakı Nobel İrsi Fondunun maliyyə vəsaiti hesabına aparılmışdır.
Açılış mərasiminə Azərbaycan Respublikası Baş nazirinin birinci müavini Yaqub Eyyubov, Milli Məclisin sədr müavini Valeh Ələsgərov, sənaye və energetika naziri Natiq Əliyev, Bakı şəhər icra hakimiyyətinin başçısı Hacıbala Abutalıbov, xüsusi olaraq İsveçdən təşrif buyurmuş qonaqlar, Nobel qardaşları ailə sülaləsinin üzvləri və digər iştirakçılar, əvvəlcə iqamətgahla tanış olmuşlar. Qonaqlara 1884-cü ildə inşa olunmuş və 2007-ci ildə Şərq və Qərb memarlığının elementlərini özündə cəmləşdirməklə yenidən bərpa edilmiş bu binanın tarixi barədə geniş məlumat verilmişdir. Bərpa olunduqdan sonra “Villa Petrolea”da Nobel qardaşlarının muzeyi, beynəlxalq biznes mərkəzi, Bakı Nobel Neft Klubu yaradılmışdır.
Tədbirdə çıxış edən Bakı Nobel İrsi Fondunun sədri Toğrul Bağırov demişdir ki, tarixi əhəmiyyətə malik bu iqamətgah Nobel qardaşlarının qlobal irsinin kiçik bir hissəsidir. Dünya elmi, sənayesi və mədəniyyətində əvəzsiz xidmətləri olan Nobel qardaşları xeyriyyəçilik və mesenatlıq kimi nəcib əməlləri ilə yadda qalmışlar.
Azərbaycanın mədəniyyət və turizm naziri Əbülfəs Qarayev, İsveçin ölkəmizdəki səfiri Hans Qunner Adan və digər qonaqlar çıxış edərək bu layihənin Azərbaycan - İsveç əlaqələrində yeni mərhələnin başlanğıcını qoyduğunu bildirmişlər.
“Villa Petrolea”nın İsveç və Azərbaycan tarixində izi, iki ölkənin mədəniyyətinə verdiyi töhfələr açılış mərasimində iştirak edən Nobel qardaşları ailə sülaləsinin üzvləri tərəfindən yüksək qiymətləndirilmişdir.
Nobel Xeyriyyə Fondunun prezidenti Maykl Nobel Bakıya gəlmələrindən böyük şərəf duyduqlarını bildirərək, bərpa-təmir işlərindən razı qaldıqlarını diqqətə çatdırmış, bu əlamətdar hadisənin böyük əhəmiyyətini vurğulamışdır. Qonaqlar bu gözəl binanın yenidən bərpasına göstərdiyi dəstəyə görə Azərbaycan Prezidenti İlham Əliyevə dərin minnətdarlıqlarını bildirmişlər.
Mərasimdə xatirə hədiyyələri təqdim olunmuşdur.
 |
 |
Bölmənin digər xəbərləri
