Bakıdakı məktəbdə yəhudi icmalarının iştirakı ilə şəhidlərin xatirəsinə həsr olunmuş tədbir keçirilib
Bakı, 30 sentyabr, AZƏRTAC
Bakı şəhərindəki 46 nömrəli məktəbdə STMEGI Humanitar Fondunun dəstəyi ilə Vətən müharibəsində həlak olmuş şəhidlərin Anım Gününə həsr edilmiş tədbir keçirilib.
AZƏRTAC xəbər verir ki, tədbirdə “STMEGI-Azərbaycan” Humanitar Fondunun rəhbəri Şaul Davıdov, Dağ Yəhudiləri İcmasının rəhbəri Milix Yevdayev, Gürcüstan Yəhudiləri İcmasının rəhbəri Zamir İsayev, Milli Məclisin deputatı Anatoli Rafailov, 46 nömrəli məktəbin direktoru Sevinc Budaqova, Qarabağ müharibəsi qaziləri iştirak ediblər.
“STMEGI-Azərbaycan” Humanitar Fondunun rəhbəri Şaul Davıdov çıxışında Sovet İttifaqının süqutundan başlayaraq, münaqişənin bütün tarixi aspektlərinə toxunub. O qeyd edib ki, Mixail Qorbaçovun təşəbbüsü ilə həyata keçirilən yenidənqurma SSRİ-nin dağılmasına, Azərbaycan və Ermənistana ciddi təsir göstərən millətçi hərəkatların artmasına gətirib çıxarıb.
Davıdov ermənilərin Dağlıq Qarabağın Azərbaycan SSR-in tərkibindən çıxarılmasını və Ermənistanın yurisdiksiyasına verilməsini ilk dəfə tələb etdikləri vaxt Qarabağ münaqişəsinin başlamasından danışıb. Bu, azərbaycanlıların Ermənistan və Qarabağ ərazisindən deportasiyasına səbəb olub. 90-cı illərin əvvəllərində Ermənistan Azərbaycan ərazilərini silah gücünə ələ keçirdi və bu, Azərbaycanın Qarabağ və onun ətrafındakı 7 rayon üzərində nəzarətini itirməsinə səbəb oldu.
Fondun rəhbəri şəhidlərin xatirəsinin yad edilməsinin vacibliyini və onların şücaətinin gələcək nəsillər üçün əhəmiyyətini vurğulayıb. O, həmçinin ölkə üçün dönüş nöqtəsinə çevrilən, ərazi bütövlüyünü bərpa etməyə imkan verən İkinci Qarabağ müharibəsinin əhəmiyyətindən danışıb.
Milli Məclisin deputatı Anatoli Rafailov çıxışında qeyd edib ki, İkinci Qarabağ müharibəsi Azərbaycan əsgərlərinin qəhrəmanlıq və fədakarlıq rəmzinə çevrilib. O, şəhidlərin xatirəsinin nəsildən-nəslə ötürülməli olduğunu, onların şücaətinin heç vaxt unudulmayacağını vurğulayıb. Rafailov onu da qeyd edib ki, müharibə etnik mənsubiyyətindən asılı olmayaraq, bütün Azərbaycan vətəndaşlarını birləşdirdi və bu birlik Qələbənin mühüm amilinə çevrildi.
Dağ Yəhudiləri İcmasının rəhbəri Milix Yevdayev çıxışında Azərbaycan yəhudilərinin Vətənin azadlığı uğrunda gedən müharibədə iştirakından qürur duyduğunu bildirib. O qeyd edib ki, yəhudi icması həmişə Azərbaycan cəmiyyətinin ayrılmaz hissəsi olub və onların Böyük Zəfərə verdiyi töhfələr xalqın birliyinin təzahürünə çevrilib. Milix Yevdayev ölkəni işğal olunmuş torpaqların azad edilməsinə aparan Prezident İlham Əliyevə müdrik rəhbərliyinə və siyasi qətiyyətinə görə minnətdarlığını bildirib.
Politoloq İlyas İsmayılov çıxışında münaqişənin beynəlxalq aspektlərinə və ədalətin bərpasında Azərbaycanın roluna diqqət çəkib. O qeyd edib ki, BMT-nin Ermənistan qoşunlarının Azərbaycan ərazilərindən çıxarılmasını tələb edən dörd qətnaməsinə baxmayaraq, Ermənistan beynəlxalq öhdəliklərə məhəl qoymayıb. Azərbaycan döyüş meydanında Zəfər qazanmaqla yanaşı, həm də informasiya müharibəsində qalib gəlməklə öz hüquqlarını bərpa edə bilib. O, beynəlxalq platformalardan bir neçə dildə çıxışlar edən, Azərbaycanın maraqlarını qətiyyətlə qoruyan Prezident İlham Əliyevin informasiya üstünlüyü uğrunda mübarizədə əsas rolu öz üzərinə götürdüyünü vurğulayıb.
Tədbirdə diqqəti çəkən yaddaqalan məqamlardan biri də Birinci və İkinci Qarabağ müharibələrində iştirak etmiş qazi Mehman Məmmədovun çıxışı oldu. Onun xatirələri və şəxsi təcrübəsi tədbirə xüsusi emosional çalar əlavə etdi.
Mehman Məmmədov Azərbaycanın bir çox ərazilərinin Ermənistan tərəfindən zəbt edildiyi Birinci Qarabağ müharibəsi ilə bağlı xatirələrini bölüşüb. O qeyd edib ki, bu, ölkə üçün çətin bir dövr olub, həmin dövrdə torpaqların qaytarılması ilə bağlı ümid demək olar ki, yox idi. Bununla belə, o vurğulayıb ki, İkinci Qarabağ müharibəsi zamanı hər şey dəyişib. Məmmədov 2020-ci ildə Vətən uğrunda döyüşmək üçün yenidən Azərbaycan əsgərləri sıralarına necə qoşulmasını fəxrlə xatırlayıb.
O qeyd edib ki, Böyük Qələbədən sonra azərbaycanlılar öz hərbi nailiyyətləri barədə fəxrlə danışa bilərlər. Mehman Məmmədov Azərbaycanı öz cəsarəti, şərəf və ləyaqətinə qaytara bilən Prezident İlham Əliyevə də dərin minnətdarlığını bildirib. Vurğulayıb ki, indi qazilər də, ölkənin bütün vətəndaşları da öz dövlətləri ilə fəxr edə bilərlər.
“Nəhayət ki, uzun illərdən sonra uğurlarımız və ölkəmizin torpaqlarının geri qaytarılması ilə fəxr edə bilərik. Qarabağ müharibəsi qaziləri indi başlarını dik tuturlar və biz əminik ki, Azərbaycan irəliyə doğru gedəcək”, - deyə müharibə iştirakçısı Mehman Məmmədov bildirib.
Bölmənin digər xəbərləri
