“BANK OF AZƏRBAYCAN”IN AUDİT KOMİTƏSİNİN ÜZVÜ “BEST-KURS” MÜSABİQƏSİNDƏ QALİB GƏLMİŞDİR
“Bank of Azərbaycan” ASC-nin audit komitəsinin üzvü Valeriya Quliyeva iyul ayında “BEST-kurs” müsabiqəsinin qalibi olmuşdur.
Bakı Banklararası Valyuta Birjasının (BBVB) informasiya-təhlil şöbəsindən AZƏRTAC-a bildirmişlər ki, V.Quliyevanın USD/AZN-nin birja məzənnəsi ilə bağlı proqnozu Birjanın Elektron Hərracları Sisteminin gündüz sessiyasının yekunlarına ən çox uyğun gələn proqnoz olmuşdur. Qalibə BBVB-nin qiymətli hədiyyəsi təqdim edilmişdir.
Xatırladaq ki, USD/AZN-in birja məzənnəsinin proqnozlaşdırılması ilə bağlı həm bank mütəxəssisləri, həm də özəl və dövlət şirkətlərinin əməkdaşları, tələbələr və digər şəxslər öz bacarıqlarını sınaya bilərlər. Bakı Banklararası Valyuta Birjasının keçirdiyi müsabiqədə iştirak etmək üçün birjanın korporativ təqviminin kəsmə kuponundan istifadə etmək lazımdır. Hər ayın son iş günündə keçirilən gündüz sessiyasının yekunlarına görə USD/AZN-nin orta hesablanmış birja məzənnəsinin proqnoz göstəriciləri qəbul edilir. Proqnozlaşdırılan məzənnə vergüldən sonra 4 rəqəm dəqiqliyi ilə göstərilməli və adı çəkilən kupon cari ayın başa çatmasına azı beş iş günü qalmış AZ 1110, Həsən Əliyev küçəsi, 57 ünvanına göndərilməlidir.
