Baş Dövlət Yol Polisi İdarəsi: Mövcud hava şəraiti yollarda təhlükəyə səbəb ola bilər!
Bakı, 15 fevral, AZƏRTAC
Baş Dövlət Yol Polisi İdarəsi mövcud hava şəraiti ilə əlaqədar sürücülərə müraciət edib.
AZƏRTAC xəbər verir ki, müraciətdə bir neçə gün davam edən mülayim hava şəraitinin bu gündən etibarən dəyişdiyi qeyd edilir: “Milli Hidrometeorologiya Xidmətinin məlumatına əsasən qarşıdakı günlərdə ölkə ərazisində temperaturun 5-10 dərəcə aşağı enəcəyi, külək, yağış, sulu qar və qarla müşahidə olunacaq əlverişsiz hava şəraitinın fevralın 18-dək davam edəcəyi gözlənilir.
Hazırda paytaxt ərazisində müşahidə olunan dumanı, eləcə də ölkə ərazisində gözlənilən qeyri-sabit hava şəraitini nəzərə alaraq, hərəkət iştirakçılarından yollarda diqqətli olmalarını xahiş edirik”.
Müraciətdə daha sonra deyilir: “Xüsusilə, səfərə çıxan sürücülərə, yük və sərnişindaşıma fəaliyyəti göstərən fiziki və hüquqi şəxslərə mövcud hava şərtlərini düzgün qiymətləndirmək, texniki-təhlükəsizlik baxımından yararsız, eləcə də mövsümə uyğun təchiz olunmamış nəqliyyat vasitələri ilə yola çıxmaqdan çəkinmək, sürət həddinə, ötmə və manevr zamanı təhlükəsizlik qaydalarına ciddi əməl etmək tövsiyə olunur”.
Bölmənin digər xəbərləri
