“BAŞLAMAQ OLARMI ÖMRÜ YENİDƏN” ŞEİRLƏR TOPLUSUNUN TƏQDİMAT MƏRASİMİ
AZƏRTAC xəbər verir ki, aprelin 29-da “Park İNN- Azərbaycan” mehmanxanasında Ədliyyə Nazirliyinin Penitensiar Xidməti və “Regionların İnkişafı” İctimai birliyinin birgə təşkilatçılığı ilə məhkumların “Başlamaq olarmı ömrü yenidən” adlı şeirlər kitabının təqdimat mərasimi keçirilmişdir.
Penitensiar Xidmətin rəisi Nazim Ələkbərov çıxış edərək bildirmişdir ki, rəhbərlik etdiyi qurumda əsaslı islahatlar, genişmiqyaslı layihələr həyata keçirilir, məhbusların saxlanma şəraiti beynəlxalq standartlara uyğunlaşdırılır.
İctimai birliyin sədri Seymur Quliyev kitabın məzmunundan danışmışdır. Bildirmişdir ki, məhkumların rəngarəngliyi ilə seçilən yaradıcılıq nümunələrində ülvi duyğular, kövrək arzular və həyat eşqi ön plana çəkilmişdir. Azərbaycan demokratik ölkə olaraq insan hüquqlarının müdafiəsi sahəsində çox işlər görür. Bunun təməlini ümummilli lider Heydər Əliyev qoymuşdur.
İctimai birliyin sədr müavini, kitabın redaktoru Taleh Həmid demişdir ki, ölkəmizdə insan hüquqlarına, söz və fikir azadlığına hörmət və qayğı ilə yanaşıldığı bir zamanda bu kitab demokratik cəmiyyətin verdiyi geniş imkanlardan biridir.
Azadlıqdan məhrum edilən insanların yaradıcılıq nümunələrində torpağa, vətənə sevgi duyğuları oxuculara təsir edəcəyini deyən T.Həmid diqqətə çatdırmışdır ki, məhbəs divarları arasında yazıb-yaradan bu qələm sahiblərinin işıqlı ümidlərinin, arzularının bitib-tükənməməsi adamı heyran edir.
Digər çıxış edənlər də kitab haqqında xoş sözlər söyləmişlər.
Kitab “Çaşıoğlu” mətbəəsində nəfis tərtibatla nəşr olunmuşdur.
######
