Bavariyada karantin məhdudiyyətləri yumşaldılır
Berlin, 6 may, AZƏRTAC
Bu gün Bavariya Hökumətinin növbəti iclasında region üzrə karantin məhdudiyyətlərinin mərhələli şəkildə yumşaldılması planı təsdiqlənib.
AZƏRTAC xəbər verir ki, normal həyata keçid mərhələli xarakter daşıyacaq. Gediş-gəlişə qoyulmuş sərt məhdudiyyətlər bu gün aradan qaldırılacaq. Bavariyalılar sərbəst hərəkət edə bilməklə yanaşı, qohumlarını da ziyarət edə biləcəklər. Onlara həmçinin qonşu ev təsərrüfatlarının sakinləri ilə (hər tərəfdən bir nümayəndə) görüşməyə, uşaq meydançalarına baş çəkməyə, restoran və kafelərin yay eyvanlarını açmağa icazə verilib.
Növbəti bazar ertəsi günündən etibarən, ticarət mərkəzləri də daxil olmaqla, bütün ticarət meydançaları öz işlərini bərpa edə biləcək. Bununla yanaşı, zooparkların, muzeylərin, kitabxanaların, qalereyaların, sərgilərin və tarixi məkanların açılması da gözlənilir.
Daha bir həftə sonra, mayın 18-də açıq səma altında pivə bağı adlanan pablar açılacaq. Mayın 25-də binalarda yerləşən restoranların, mayın 30-da isə bütün otellərin açılacağı bildirilir.
Yuxarıda sadalanan bütün sahələr və ictimai yerlər öz işini ciddi sanitariya normalarına riayət edilməsi şərti ilə bərpa edə biləcəklər. Lakin hökumət hələ də vətəndaşlardan sosial əlaqələri minimuma endirməyi xahiş edir.
Vüqar Seidov
AZƏRTAC-ın xüsusi müxbiri
Berlin
Bölmənin digər xəbərləri
