BELARUS PREZİDENTİ YAXIN VAXTLARDA AZƏRBAYCAN PREZİDENTİ İLƏ GÖRÜŞMƏYİ PLANLAŞDIRIR

14.04.2006 [18:09]
Çap et
A⁺ A^-

AZƏRTAC-ın İTAR-TASS-dan aldığı xəbərə görə, Belarus Prezidenti Aleksandr Lukaşenko yaxın vaxtlarda Azərbaycan Prezidenti İlham Əliyev ilə görüşməyi planlaşdırır. Bunu o, aprelin 13-də Azərbaycanın Belarusdakı səfiri Tələt Əliyev ilə Minskdə görüşündə bildirmişdir.

Aleksandr Lukaşenko demişdir: “Biz bir sıra problemləri müzakirə etmək üçün görüşəcəyik. Elə problemlər ki, onların həll olunması dövlətlərimizi əməkdaşlığın daha yüksək səviyyəsinə çıxaracaqdır”.

Belarus rəhbəri iki ölkə arasında ticarət-iqtisadi əməkdaşlığın genişləndirilməsinə zərurət və tələbat olduğunu vurğulayaraq bildirmişdir ki, “bizim yaxşı perspektivlərimiz yaranır, ticarət dövriyyəsinin dinamikası pis deyil, hərçənd onun həcmi daha böyük ola bilərdi”.

Aleksandr Lukaşenko demişdir: “Belarusun və Azərbaycanın əməkdaşlığı gücləndirmək üçün yasaq mövzuları yoxdur. Diplomatik və siyasi münasibətlərə gəldikdə, burada da heç bir problemimiz yoxdur. Azərbaycan Prezidenti ilə şəxsi münasibətlərimiz çox yaxşıdır”.

Səfir Tələt Əliyev Aleksandr Lukaşenkonu martın 19-da keçirilən prezident seçkilərində qələbə qazanması münasibətilə təbrik etmişdir.