Berluskonilərin Sardiniya adasındakı villası 500 milyon avroya satışa çıxarılıb
Roma, 1 fevral, AZƏRTAC
Berluskoni ailəsi Sardiniya adasındakı “Villa Certosa” malikanəsini 500 milyon avroya satışa çıxarıb.
AZƏRTAC xəbər verir ki, Silvio Berluskoninin həyatında özəl yeri olan villanın satışı onun beş övladının razılığı ilə “Dils” daşınmaz əmlak şirkətinə həvalə edilib. Əmlakın satışı üçün ilkin tələb yarım milyard avrodur.
Silvio Berluskoni 110 hektar ərazidə yerləşən bu tarixi iqamətgahı 1980-ci illərin sonunda alaraq əsaslı təmir etdirib. Mülk 68 otaqdan, Aralıq dənizinə birbaşa çıxışdan, bir neçə üzgüçülük hovuzundan, tennis kortundan, 80 futbol meydançası böyüklüyündə meyvə bağlardan və amfiteatrdan ibarətdir. Silvio Berluskoni burada Britaniyanın sabiq Baş naziri Toni Bleyr, Rusiya Prezidenti Vladimir Putin, Çex Respublikasının sabiq Baş naziri Mirek Topolanek kimi müxtəlif dövlət və hökumət başçılarını qonaq edib. Malikanənin təkcə ləl-cavahiratı 259 milyon avro dəyərində qiymətləndirilir.
Xatırladaq ki, İtaliyanın sabiq Baş naziri və “İrəli, İtaliya” (Forza Italia) Partiyasının sədri Silvio Berluskoni ötən il 86 yaşında dünyasını dəyişib. O, vəsiyyətində mülklərinin idarə olunmasını varislərinə həvalə edib.
Nihad Budaqov
AZƏRTAC-ın xüsusi müxbiri
Roma
Bölmənin digər xəbərləri
