BERNDƏ AZƏRBAYCANIN ÜMUMMİLLİ LİDERİ HEYDƏR ƏLİYEVİN 85 İLLİK YUBİLEYİNƏ HƏSR OLUNMUŞ TƏDBİR KEÇİRİLMİŞDİR
Azərbaycanın İsveçrədəki səfirliyindən AZƏRTAC-ın xüsusi müxbirinə bildirmişlər ki, səfirliyin təşəbbüsü ilə Bern şəhərinin musiqi konservatoriyasında Azərbaycanın ümummilli lideri Heydər Əliyevin 85 illik yubileyinə həsr olunmuş konsert təşkil edilmişdir.
Konsertdə İsveçrə XİN-in, ölkə parlamentinin və Berndə akkreditə olunmuş diplomatik missiyaların nümayəndələri, eləcə də yerli ictimaiyyətin təmsilçiləri və İsveçrədə yaşayan həmvətənlərimiz iştirak etmişlər.
Konsert proqramının açılışında çıxış edən Azərbaycanın İsveçrədəki səfiri Elçin Əmirbəyov ulu öndər Heydər Əliyevin həyat və fəaliyyəti haqqında, onun müstəqil Azərbaycan dövlətçiliyinin yaranmasında və möhkəmlənməsində rolu barədə tamaşaçılara geniş məlumat vermişdir.
Sonra Azərbaycan Respublikasının əməkdar artisti Adilə Əliyeva dünya miqyaslı klassiklər List, Şopen, eləcə də görkəmli Azərbaycan bəstəkarları Qara Qarayev və Vaqif Mustafazadənin əsərlərini ustalıqla ifa edərək, tamaşaçılara xoş təəssüratlar bəxş etmiş, alqışlarla qarşılanmışdır.
Konsertdən sonra iştirakçılar üçün ziyafət təşkil edilmişdir.
Bölmənin digər xəbərləri
