Berni Ekklstoun: Başqa traslar Bakıdan nümunə götürməlidir
Bakı, 22 iyun, AZƏRTAC
Bakıda birinci yürüş çox uğurlu oldu. Yeni tras həm yürüşçülərin, həm də tamaşaçıların xoşuna gəldi. Təşkilatçılıq da yüksək səviyyədə idi. Yürüş başa çatandan sonra “Formula-1”in rəhbəri Berni Ekklstoun vurğulayıb ki, başqa Qran-prilərin təşkilatçıları bakılılardan nümunə götürməlidirlər.
Berni Ekklstoun: “Əgər bütün təşkilatçılar burada şahidi olduğumuz səyləri göstərsəydilər, əla olardı. İnanılmaz işlər görüblər. Tras çox yaxşıdır. İstəyirdim ki, maşınlar mütləq qala qapılarının yanından keçsin və bu kadrlar televiziya ilə yayımlansın. Elə belə də oldu.
Əlbəttə, ayrı-ayrı problemlər də oldu, amma bu normaldır, axı burada ilk dəfə idi ki, yürüş keçirirdik. Trasın gələcəyinə və təşkilatçıların öz üzərinə götürdükləri vəzifələrin icrasına gəldikdə isə narahatçılığa əsas görmürəm”.
Yürüşçülər də razı qalıblar. Lyuis Hemilton deyib: “Bura həqiqətən indiyə qədər görə bilmədiyimiz qiymətli daşdır. Üstəgəl hava inanılmaz dərəcədə gözəl idi”.
Buna baxmayaraq, şayiələr gəzir ki, Avropa Qran-prisinin start haqqı yüksək olduğuna görə “Formula-1” ilə beşillik müqaviləni yerinə yetirmək təşkilatçılara çətin olacaq. Amma trasın icraçı direktoru Arif Rəhimov belə söz-söhbətləri əsassız sayır.
Arif Rəhimov: “Hökumət Qran-prinin ölkəyə gətirdiyi üstünlükləri yaxşı başa düşür. Bu, bizim üçün çox vacibdir. Axı biz məhz buna görə bu yürüşü təşkil etməyə razılıq verdik və bundan əl çəkməyə hazırlaşmırıq. Mərhələmiz hamının xoşuna gəldi. Ümidvarıq ki, “Formula-1” ilə münasibətlərimiz uzunmüddətli olacaq”.
Bölmənin digər xəbərləri
