Beynəlxalq ekspert: Azərbaycan regionda müasir yaşıl logistika modeli formalaşdırır
Bakı, 15 may, AZƏRTAC
Azərbaycan son illərdə nəqliyyat infrastrukturunun genişmiqyaslı modernləşdirilməsi və ekoloji standartların tətbiqi sayəsində regionun əsas tranzit və logistika mərkəzlərindən biri kimi mövqelərini əhəmiyyətli dərəcədə möhkəmləndirib.
Bu fikri AZƏRTAC-ın saytında yayımlanan “Azərbaycan və dünya” proqramının növbəti buraxılışında logistika və nəqliyyat marşrutlarının inkişafı üzrə beynəlxalq ekspert Qaydar Abdikerimov səsləndirib.
Onun sözlərinə görə, Bakı Beynəlxalq Dəniz Ticarət Limanının Ələtə köçürülməsi, dəmir yolu infrastrukturunun inkişafı və nəqliyyat xətlərinin elektrikləşdirilməsi ölkənin tranzit potensialının gücləndirilməsi baxımından strateji əhəmiyyətli qərarlar olub. Ekspert qeyd edib ki, dəmir yollarının müasir enerji təchizatı sisteminə keçirilməsi daşımaların səmərəliliyini əhəmiyyətli dərəcədə artırmağa və daha ekoloji logistikanın təmin olunmasına imkan verib.
O vurğulayıb ki, Ələt limanından Böyük Kəsik stansiyasına qədər tam elektrikləşdirilmiş xətt beynəlxalq yükdaşımalar üçün faktiki olaraq yaşıl dəhliz formalaşdırır. Ekspertin qiymətləndirməsinə görə, ESG standartlarına uyğunluq və ekoloji dayanıqlı logistika prinsiplərinin tətbiqi Avropa tərəfdaşları ilə əməkdaşlıqda Azərbaycanın ciddi rəqabət üstünlüyünə çevrilir.
Müəllif – Tamilla Məmmədova
Bölmənin digər xəbərləri
