Birinci rübdə Qəbələdə ümumi məhsul buraxılışının həcmi 81 faiz artıb
Qəbələ, 1 may, Mustafa Dadaşov, AZƏRTAC
Bu ilin birinci rübündə Qəbələ rayonunda iqtisadiyyatın əsas sahələri üzrə məhsul buraxılışının ümumi həcmi ötən ilin müvafiq dövrü ilə müqayisədə 81 faiz artaraq, 115,2 milyon manat olub.
Bu barədə AZƏRTAC-ın bölgə müxbirinə Qəbələ Rayon Statistika İdarəsindən məlumat verilib.
Qurumdan bildirilib ki, hesabat dövründə rayonda 33,9 milyon manatlıq sənaye, 12,6 milyon manatlıq kənd təsərrüfatı məhsulları istehsal edilib, 49,3 milyon manatlıq tikinti işləri görülüb. Birinci rübdə ticarət xidmətlərinin həcmi 17,9 milyon manat, nəqliyyat və anbar xidmətləri 1,1 milyon manat, informasiya və rabitə xidmətlərinin həcmi isə 300 min manat olub.
Məhsul və xidmətlərin 83,2 faizi istehsal, 16,8 faizi isə xidmət sahələrinin payına düşüb.
Cari ilin ilk üç ayında rayonda əhalinin hər nəfərinə düşən məhsul və xidmətlər 1068 manat təşkil edib.
Bölmənin digər xəbərləri
